現年25歲的宅男女神譚嘉儀（Vivi），今年9月宣佈同拍拖兩年多，比佢年長十歲嘅男友Kenny拉埋天窗，消息一出可謂傷透一眾少男心。前日就係Vivi大婚日子，婚宴筵開30席，喺金鐘一間酒店舉行。
剛剛成為人妻嘅Vivi，今日接受《蘋果》訪問，佢話：「前日係擺酒同埋註冊，喺婚宴自己都忍唔住喊咗好多次，因為真係好感動，老公喺台上面講咗好多愛的宣言，因為佢平時係一個唔多識講情話嘅人，所以真係好驚喜。」
而另一個驚喜環節，就係Kenny原來秘密去學吹Saxophone，婚宴當晚就係交功課嘅日子，Vivi話：「之前真係完全唔知佢偷偷去咗學，佢吹完之後仲突然下跪，然後送咗99枝玫瑰畀我，呢份心意真係好感動。」
問Vivi婚後會唔會即時開工「造人」？佢就話同老公都希望先過二人世界，年中就會出發去蜜月旅行。Vivi父親前年忽然因病猝逝，令一向跟父親感情要好嘅佢受咗好大打擊，Vivi感觸話：「成個婚禮都好完美，所有佈置都係我夢想嘅嘢，最重要係屋企人同最好嘅朋友都嚟咗，唯一係爸爸睇唔到我出嫁，呢個係我最大嘅遺憾！」
樣子甜美嘅Vivi雖然年紀輕輕，但當模特兒嘅年資已經近8年，15年因為同網絡紅人達哥一齊拍旅遊網站廣告人氣急升，火速被網民封為宅男女神。不過，前年佢為咗追夢，毅然將模特兒工作放下，隻身飛去日本修讀藍帶廚師課程。Vivi話：「因為爸爸生前都係做廚師，自細都受佢影響，對入廚好有興趣，最後得到爸爸嘅支持，先至有勇氣去追夢，可惜佢始終睇唔到我畢業。」
問Vivi婚後係咪會繼續模特兒工作？佢就話：「一定會呀！但係都想向其他方面發展，因為之前發現好多外國嘅小朋友床好靚，而且品質都好好，所以喺法國傾咗一個牌子嘅代理返嚟，嚟緊都希望可以帶多啲好嘢畀香港嘅小朋友。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|