2013年10月17日 星期四

星夢私語: 32歲守處 陳明恩戴貞操戒




上週六( 12日)問到陳明恩拍拖未,她亦即時雙手托面,表示:「未呀!神仲未賜畀我呀!」而當晚她亦有戴貞潔戒指,但被手套遮住。

真面目

星夢私語: 32歲守處 陳明恩戴貞操戒

玩咗 3個月嘅《星夢傳奇》,週日終於結束,由頭帶到尾嘅鄭俊弘以 161,046票大熱勝出,仲做埋雙料冠軍,靚媽、靚家姐齊齊撐場,但自幼已拋棄他的生父零表示,連 Fred自己都話:「未收到佢祝福。」成為攞獎遺憾。

而鬼妹陳明恩決賽當晚揀錯歌只排第三,喜歡挑戰高難度嘅鬼妹仔,原來到𠵱家都未拍過拖,右手中指更一直戴貞操戒,提醒自己要貞潔, 32歲仲係處女,真係估佢唔到喎!

陳明恩經常戴貞潔戒指,好少機會除下,她表示結婚後先會考慮唔戴。《蘋果日報》圖片

32歲陳明恩因《老表,你好嘢!》而被人認識,但鬼樣令角色局限,劇集演出機會較少;而一向唱得跳得嘅佢,直到《星夢傳奇》先被觀眾注意,可惜週日( 13日)決賽,揀咗難度極高嘅謝安琪名曲〈我歌故我在〉,令陳明恩只能得第三名。

鬼妹仲係處女

未能摘冠,未有令陳明恩洩氣,皆因《星夢》帶挈密賺登台錢,騷價亦由 8,000蚊 3首歌,升至 2萬蚊。加埋拍劇及教跳舞,令陳明恩收入勁升。她說︰「《星夢》令我多咗人識,但又唔算多咗好多 job,有啲夜場騷我唔會接,主要睇工作性質,錢係其次。」陳明恩父親是基督教宣教士,自小家教亦相當嚴,因擔心在學校受不良影響,所以小學至中學,陳明恩都沒有正式返學,只在家由任職教師的母親教導 Accelerated Christian Education遙距課程。

陳明恩亦因宗教關係,連拍拖都有原則,至今仍然未拍過拖,更每天戴住貞潔戒指,提醒自己要守貞操,她說︰「以前都有男仔向我表示過,但始終發現唔啱,所以冇發展。(係咪一定要係教徒?)唔係,但我諗係嘅話,理念會一致啲,不過到𠵱家,神仲未賜畀我呀!等吓先啦!我唔急嘅!」陳明恩早前接受電台訪問,坦言自己仍是處女,更對此感到非常自豪。

陳明恩同家人關係融洽,新西蘭籍父親為宣教士,澳洲籍母親為教師,父母一直為香港低收入人士服務,當晚連阿哥都到場支持。

決賽當日陳明恩揀咗謝安琪嘅〈我歌故我在〉,由於難度甚高,令明恩有點失準,有唔少網友更話佢揀錯歌。

陳明恩最後以 20,114票得第三,但她坦言好滿意,她說:「我由第一日開始已經諗住輸,能夠嚟到決賽,已經賺咗。」

陳明恩之前自資出過兩首歌分別係〈異種〉和〈底線〉,現忙錄歌,將會喺 12月出隻廣東大碟。

細個住錦田,陳明恩現同家人住在沙田富豪花園,雖然星夢帶挈搵多咗,但陳明恩冇諗過搬出嚟住。

鄭世豪:希望繼續有工開

《星夢傳奇》除咗鄭俊弘被力捧外,另一爆點就係鄭世豪,由當日冇機會玩,到今日攞第二,鄭世豪發夢都估唔到。但原來唱得嘅鄭世豪, 3年前已跟黑妹李麗霞登台,每次執 5,000蚊至 1萬,每月仲有 4,5場,收入都算唔錯。鄭世豪說︰「 3年前師父(黑妹)睇到卡拉之星,覺得我 ok,叫人問我有冇興趣登吓台,咁就開始跟佢搵食喇!佢教咗我好多嘢,冇佢我冇今日,但𠵱家最想係續約,因為仲有年半就約滿無綫,希望公司畀機會我,等我繼續有工開。」

鄭世豪入行多年,圈中人緣佳,曾合作拍攝的《法網狙擊》的陳敏之、森美及陳志健專程到場支持。

3年前得到跑慣江湖的黑妹(中)賞識,鄭世豪開始跟佢登台,初時 2, 3千到𠵱家有 1萬蚊,他更以師父稱呼黑妹。

宣布冠軍一刻,鄭世豪同鄭俊弘攬住一齊,他說:嗰刻已經冇諗冠軍,反而諗起以前一齊喺《皆大歡喜》做路人甲,食飯盒。」

鄭世豪原本連參加《星夢》機會都冇,到最後得到第二,令佢喺台上多次落淚。

攞獎遺憾 鄭俊弘冇收生父祝福

鬼妹陳明恩繼續等愛,而雙料冠軍鄭俊弘( Fred),決賽當晚以 161,046票成為冠軍,靚媽及靚家姐亦成為焦點。原來,家姐 Tiffany喺香港獵頭公司 Links任職,而媽媽喺加拿大就做地產經紀,鄭媽媽表示會逗留到 12月,但問到仔仔的女友薑麗文,伯母就話未見過,真唔真呀?她說︰「未見過喎,佢自己都未搞掂,唔好拍拖住喇, 40歲先拍拖結婚啦。」

當晚一眾加拿大親友專登飛來香港支持 Fred,唯獨生父仍然冇表示, Fred說︰「冇收過佢祝福。」而鄭媽媽亦表示同前夫已沒有聯絡。成為星夢冠軍, Fred真係有排忙,他說:「我會先去意大利拍旅遊節目, 11月返嚟開新劇。」而《星夢》期間,一直有好多商場騷搵 Fred,但要練歌所以全部推掉,年尾就要開始放期「還債」,據知聖誕及農曆新年檔期已排滿,搵咁多,鄭媽媽唔使再擔心啦!

由《星夢》第一集開始,鄭俊弘儲下唔少粉絲,完騷後大批粉絲喺電視台等阿 Fred慶祝。

雖然未收到生父祝福,不過有阿媽同家姐到場支持,阿 Fred已經好開心。

當晚阿 Fred基本上超班攞硬冠軍,不過到宣布得獎一刻依然激動流淚。

鄭俊弘緋聞女友薑麗文係王維基員工,當晚當然不能現身,但亦有喺微博為阿 Fred拉票。

姚兵:老婆搵錢多過我!

放棄寧波戶籍,正式成為「香港人」的姚兵,最後得第四,但爆咪唱功,及對老婆嘅情深,令佢挽回唔少分數,仲話老婆為佢犧牲太多。他說:「佢本身做廣告生意,收入亦唔錯,搵錢亦多過我,我好希望搵得多過佢,但當時機會唔多,佢為咗個仔,放棄咗自己嘅事業,我覺得好對佢唔住,我希望嚟緊自己有多啲機會,等我補償番一切。」

姚兵同太太喺香港認識,二人都喺國內出身,姚兵說:佢好了解我嘅難處,好識開解我,有呢個老婆開心過攞任何獎。」

上週六( 12日)選四強,姚兵除咗喺台上多謝老婆,更喺台上親吻姚太。

姚兵未受到《星夢》帶挈,暫時工作都係 TVB8《娛樂最前線》主持,他說:「希望廣東話再好啲,等可以拍劇。」



鍾意就快D Share啦!