2013年10月17日 星期四

自資 50萬搞音樂節 梁安琪:周啟生衰過白癡!




出錢出力搞音樂節, 54歲梁安琪雖然不是天使,但一樣搖擺,乜都敢講寸嘴格。去年在 fb宣布與曾航生的 19年情玩完,叠埋心水搞 band騷;至於前度,則簽約無綫拍劇搵食。

搜尋氣

自資 50萬搞音樂節 梁安琪:周啟生衰過白癡!

周啟生話樂壇處於「末期癌症」。其實,「病況」日趨嚴重,非一日之寒啦,亦都唔係最近先至有人鬧。不過鬧得人多,實情出錢出力搞振興樂壇嘅又有幾個?

18歲開始做 DJ、 19歲加入商台主持十年《搖擺天使》、《純搖擺》、之後忽然活躍政壇的梁安琪,政治癮冇咗,反而歌癮再起, 54歲的她,最近自資五十萬、窮一己之力,搞咗個「搖擺天使勁 BAND音樂節」,仲承諾不惜蝕本會繼續搞落去:「嗰啲做緊音樂仲要鬧樂壇嘅人,有咩幫助呢?仲衰過白癡!」

其他影片

50萬唔係話好多,陳豪都攞 50萬出嚟買補品畀陳茵媺啦!都要肯攞出嚟至得㗎!蝕係蝕硬,但係做人係唔係一定要滿身銅臭先?呢幾年一直有人提議我搞韓流騷、請韓星,機場點都有幾百人接機、主流傳媒一定日日講、大富大貴唔使講……我搞呢個音樂節,蝕曬錢、得兩間傳媒入嚟採訪,出又係細細格,其實為咩呢?咪就係為下一代囉!

點解我哋做 band冇出路?點解外國 band可以有私人飛機?點解以前年年有嘉士伯流行音樂節?有許冠傑溫拿同 Beyond,𠵱家啲細路就冇得參與、冇平台演出?紅館得五月天呼風喚雨一票不剩呢?呢個世界唔使個個讀哈佛、史丹福㗎,史提芬史匹堡都冇 degree啦!你哋係唔係下一代個個走去炒金炒樓炒股票先?我冇細路,我當咗香港 band仔、 band song係我下一代,你淨係識鬧,對樂壇對下一代有咩好處呢?

香港愈嚟愈衰,俗啲講句,咪就係啲人一味講,淨係識吹水唔去做之嘛!嗰個周啟生,做緊音樂仲要鬧樂壇,根本對下一代得壞影響,咪就係教人譁眾取寵同得把口之嘛!你係樂壇人,又要想樂壇死,樂壇死咗你會好咩?你話係唔係仲衰過白癡?

自資 50萬、一手一腳申請場地、搵贊助、搵嘉賓,成個《天與地》阿 Yan熟女版咁。上週二( 8日)第一屆「搖擺天使勁 BAND音樂節」順利舉行,雖然蝕錢又少傳媒報道,但梁安琪話一定搞落去!

19歲加入商台主持搖滾音樂節目、是 Beyond出道第一個訪問電台主持:「我資格夠老,輩分夠足,想盡一分力搵番八、九十年代嘅香港搖滾精神返嚟。」

早前周啟生在電台節目大鬧香港樂壇「末期癌症」、又數陳奕迅五宗罪,梁安琪話:「得把口,衰過白癡。」《蘋果日報》圖片



鍾意就快D Share啦!