幸福滿瀉
上週六（ 28日），陳茵媺在晨早 5時落機，愛妻號陳豪一見太太便即刻上前輕撫嬌妻凸起的小腹，成副幸福樣。
真面目
待產夫妻 老婆接奶粉廣告 陳豪停工陪茵媺安胎
金童玉女陳豪、陳茵媺呢 pair本來已經平易近人萬千寵愛，五月有餡、六月成婚以來，更加係雙喜臨門心情靚爆，去到邊都幸福甜蜜仲有能耐感染埋身邊人。上週六（ 28日）清晨五點，陳茵媺回港待產，小別兩個月嘅老公陳豪接機，影相訪問簽名仲同全場記者大合照，榮登最受歡迎圈中伉儷！
結婚係計劃之中， BB就係意料之外，搞到好好先生陳豪陣腳大亂，原定的離巢、北上、做生意大計全部要重新計劃，除了搵真銀的奶粉廣告，陳豪實行停工至下年，等老婆生完至算。
七月風塵僕僕飛去多倫多擺酒，新郎哥陳豪前後停留九日就丟低大肚嬌妻趕回港，無非為咗開工賺多啲奶粉錢。週六（ 28日）離開機場後，齊齊返回大埔比華利山三千萬新裝獨立屋，由陳豪向 Aimee展示親自設計及監工新屋成果。兩公婆新屋落腳後，除咗開開心心迎接新生命，亦有頭痕位，就係要乖乖同 TVB傾新約。
大計泡湯
自從二千年從電影圈轉陣電視、簽約無綫，陳豪極速晉升一線小生，亦任勞任怨長年埋首電視城耕耘。十三年後，陳豪地位非一般，諗頭亦都唔同當初，年初與無綫合約尚有一年未屆滿時，已經高調放話打算向外闖。
「都係諗好曬，先至夠膽講出嚟嘅！其實阿 Mo一直好想做生意，呢幾年拍劇都係主要同老拍檔合作，唔係咩劇都肯拍。咁戚其義、梅小青、劉家豪都離開無綫囉，所以佢都唔想再留。本來嘅計劃係簽 TVBC，做生意為主，其他時間北上拍劇搵真銀，結果五月 Aimee有咗 BB，計劃就亂曬！」陳豪身邊人透露。
續約轉陣
年初幾乎立定主意不續約，本來還埋《法外風雲》及下年另一套由新監製陳耀全拍攝的新劇兩個劇債就全力北上，如今太太有餡當然就要另作打算。
據悉為不想長期丟下妻兒，陳豪先打消北上拍劇念頭，又為保持固定曝光和收入養家，陳豪正式與無綫商討新約細則中。為妻兒焗留低的陳豪亦實行兵分兩路，趁住幸福待產期，積極與 Aimee齊齊接廣告搵快錢。而形象正面的陳氏伉儷亦確實有價有市， Aimee懷孕後期及產後一年的工作表，已經被廣告商及客戶 mark實，除了陳太今週以 20萬接一手表活動外，盛傳極有機會接下的奶粉廣告就有八位數字酬勞。對於夫妻檔搵食，陳豪週日則說：「等經理人安排，有人接觸過！」
禦用監製閃曬
陳豪拍劇受歡迎，近年更成為三大監製戚其義、梅小青和劉家豪的禦用男主角，可惜以上三人已分別離巢， 13年唯一拍過的劇集《法外風雲》是由新回巢監製徐正康拍攝，朝中冇曬相熟監製，筍盤就算肯續約都要跟其他人磨合。
|
鍾意就快D Share啦！
|
|
|