豪語錄
鏗鏘玫瑰 鄭世豪
像曠野的玫瑰，用脆弱的花蕊，想抗拒綻放後的枯萎。
——林憶蓮《鏗鏘玫瑰》
女同事說，估唔到鄭世豪真人比上鏡靚仔。我同意，尤其知道他是 TVB籃球隊隊長，高大黑實嘴闊闊，話似櫻木花道亦不為過。
命運既注定又有得揀。
群眾印象注定來自鏗鏘駕駛學院那廣告：但鏗鏘，也可以揀玫瑰，對於愛唱歌者。
《聖經》說：「就是所羅門極榮華的時候，他所穿戴的，還不如這花一朵呢。」
（《馬太福音》六章廿九節）鄭世豪說：「十多年努力，還不如一晚《星夢》。」
本週他比 King-Maker刻意栽培的男主角更紅。社會太鬱悶，需要奇跡來點綴。
玫瑰之所以珍貴，珍貴在它容易枯萎。
盛放，然後呢？得獎的鄭世豪仍未知幾時出唱片……
先別管，眼前鄭世豪很開懷。請翻至下一頁，他正畫龍點睛飾演着「大口仔」——那個帶點先天不足卻娛己娛人的男生。
不再猶豫
收到什麼禮物或買什麼來獎勵自己？
「很多祝福短訊，已夠開心了，不用講禮物，更不用獎自己，男人嗜好太花錢，例如玩車，我雖然拍的是駕駛廣告，但無追求 dream car，否則過不到日子。」
片約算不算？
「《掃毒》是一早接落的，好開心有份同劉青雲、古天樂拍電影。那張劇照有我，其實我又係飾演手下，下一鏡頭便被打死。」
的確，時來運轉，但總不至通通嚟得咁快，鄭世豪預期，今後應該仍以拍劇為主，能多接些唱歌 job於願足矣。相對冠軍鄭俊弘拜巫啟賢為師，亞軍的他啟蒙來自黑妹李麗霞，密食當三番型，比踏實更踏實。
「唱商場 show我也做分析，舊歌比新歌穩陣，事關擔櫈仔霸頭多數年長觀眾，我連六、七十年代的歌都識。」實戰磨練得鄭世豪不只一股傻勁發歌星夢。「到《星夢》，對象是全香港，我可以唱最愛的 Beyond了。」
選曲也點題，叫《不再猶豫》。
止痛藥
故事由入行開始，喜歡的是唱歌，「但普通人家出身，不可能即刻有唱片公司簽。我做過珠寶做過 IT，○一年投考訓練班。」被定位為小人物演員，距離偶像歌手路反而兜遠。「我明白這種講法，但難得是份相關工作，建立了知名度又可接些唱歌 Job外快。」
藝訓班導師羅冠蘭，戲劇精英教學員們如何建立角色，但學員們畢業通常做路人甲，劇本是不會交代路人甲成長經歷供你建立的。理想很高遠，現實很低迷。
「 Miss Law教我們觀察，我養成八卦周街望的習慣。演最密古惑仔，古惑仔其實很多種，惡形惡相係，陰陰濕濕𢱑身𢱑勢係，劇本沒指定的，我便每次演不同型格，算樂趣，也算對自己有交代。
「我應徵廣告的命中率甚低，只拍過兩條，都和車有關，一條是鏗鏘——新一輯加入了唱歌，一條是政府宣傳技工牌照。託賴靠平日觀察，可能我去得少貴價食肆，吃茶餐廳多。
「十幾年來，久不久總有進步，唔可以一味話白費，哈今次對白長咗，哈終於角色有名字，每次都係鼓舞。眼見同事的奇跡，例如徐榮，更加鼓舞。」
搭不上嘴，小演員心目中奇跡也是小小的——究竟叫鼓舞抑或止痛藥？
「止痛藥都係生活必需品吖，家居旅行。」大口仔戇笑了。
後備建功
唱歌志願，寄託於《歡樂滿東華》的「卡拉之星」——類似公益金百萬行，籌夠善款即獲表演機會。
「由○三年我便參與，幕後人員好有心，夾錢讓我們每人唱一小段。我本身沒什麼籌款能力，是鍾意到人人都知，每到東華就捐錢支持我，當然有人笑我傻仔，但大多數同事志在為善最樂，所以近年我有得唱曬成首歌。多謝鄧梓峰，我出場時還介紹這是『鄭世豪十周年演唱會』。」
他參加《星夢傳奇》更曲折，報名，卻不獲通知上台——首先要問，《星夢》真為你們而設嗎？當初相傳不是為捧紅欽點的親生仔女而設的嗎？
「我打籃球，習慣每場初賽都當決賽咁拼搏去打，點知連初賽都無份。但怎說呢，始終是電視節目，要考慮娛樂性和知名度，有篩選機制無可厚非。
「我作為 TVB籃球隊長，最頭痕也是編排出場表。有些同事很想打但無時間練，有些實在技術麻麻，考慮到聯誼同樂性質，我都盡量安排人人有得落場幾分鐘，開心吓。」
在行內行外呼聲下，鄭世豪獲邀中途加入《星夢》，結果贏埋亞軍。公唔公平？報名石沉大海固然不公平，「外咭」參賽卻是另一種不公平，但從觀眾反應和收視颷升，戰果又實至名歸。複雜辯證得像一堂邏輯課。
「總之開心啦。」想太多的人不會勤力。至於下一目標出唱片，幾許大歌星都嫌無利可圖了，鄭世豪仍像教徒之於洗禮般虔誠。「心願，完成埋才覺得真的做到歌手。」
沒有奇跡
鄭世豪小時候住黃大仙舊型公屋。「爸爸做製衣廠，趕訂單很夜收工，每晚兩個哥哥和我落地鐵站接他，一齊去消夜才睡覺。第二天爸爸抱着我落四層樓梯，到隔籬座上七層樓梯的天台幼稚園上學，然後返工。
「媽媽日間去銀行揸大數——掃把個掃，到我放學，就帶埋我去有錢人家做清潔工。」
很好，這才是生活，莊敬自強、親慈子孝的道理都盡在不言之教了，遠比當今港孩充實。
「所以怎能不報答他們呢？怎好意思自己先買車呢？如果不是我唔生性揀咗做演員，應該更早可以報答。我並非懶，但演員唔一定勤力就搵到錢。」
上期本刊報導鄭世豪拖女友試婚紗，喜事曝光。他說：「都諗過對事業有冇影響，但我卅幾歲，適婚年齡嘞。」
對，周潤發、劉德華揚名立萬之際才十八廿二，大條道理謀定而後動；社會遲熟，奇跡般誕生的「新人」原來也「新」了十多載，時間唔等你。其實，這是沒有奇跡的年代。
傲慢與偏見
眼前鄭世豪很開懷，拍攝途中自動波唱起《 IQ博士》主題曲，除了童心未泯，一半應該係來自抵得諗。
他抵得諗到要幫每一在場人員泡製咖啡，我不懷疑其真心；我見過真心地和善可親的王菲——在還叫王靖雯階段。如果驕傲算一種病，娛記算是閱人無數的醫生了。吊詭者，當星星們自誇誠懇謙虛，往往乃症候開始，正如暴食是厭食症先兆。
有一百個驕傲的理由，否則會缺乏星味、會順得哥情失嫂意、會一世與二打六為伍……直接講除非你唔想變，咁你搏成名嚟做乜？娛記是不變的，因為娛記沒有星夢傳奇。
道別時，鄭世豪攬實我，我覺得似情侶最後擁抱，下次見面禮貌握手點頭便夠，我想你活得比我好，無資格患驕傲病的人只不痛不癢。
醫生很悶。
|
鍾意就快D Share啦！
|
|
|