向來握有電影剪片權的劉華，最終還原自己做《風暴》主角。
探熱針
無口齡 開戲擔正氹續約 劉華老點林家棟
不經不覺效力劉德華做老闆的經理人公司已經十二年的林家棟，電影雖然長拍長有，監製又做過，獎又攞過，偏偏一直苦無機會擔正做男主角。人望高處，林家棟決定離巢外闖，夾啱時間，劉華投資的電影《風暴》開拍，老闆以擔正男主角做利誘，氹林家棟留低，不過素來擁有「最終剪片權」的劉天王，大刀一揮下，林家棟最終由主角變配角，難怪十二年賓主關係最終要各行各路。
主角變配角
歷年投資電影大多損手收場的劉華，自前年投資《桃姐》名利雙收後，今年再下一城開拍警匪片《風暴》。另一邊廂，成為旗下藝人已經十二年的林家棟約滿在即，知道對方有意離巢，劉華於是主動安排林家棟孭飛做《風暴》男主角，作為續約籌碼，林家棟亦承認戲中角色有突破：「今次真係要多謝江老闆（安樂電影）同華仔，佢哋希望我更上一層樓，覺得我好適合去做……都係主角之一，條件就係要減肥。」
有份睇過試片的人士透露，林家棟在《風暴》的演出的確搶鏡，但論賣埠能力，同天王級劉華無得比，基於商業理由，加上劉天王一向擁有電影最終剪片權，電影最終將故事重心放回劉華身上，至於《風暴》宣傳片，林家棟更只出現一兩個鏡頭，變回大配角。
堅持離開
跟劉華搵食十二年，林家棟就算密密有工開，但永遠只做天王身邊好友、下屬，局限了演技發揮，加上林家棟打算主力發展電影監製工作，所以拍罷《風暴》後，決定結束同劉華十二年的賓主關係，轉投寰亞電影。
「佢跟咗劉生十二年終於有得做主角，我哋一班幕後都戥家棟開心，不過佢好有自知之明，到時套戲出到嚟，未必係原先所講咁樣，家棟覺得係時候要啲新衝擊，所以決定離開向外闖。」一名曾與林家棟共事的幕後人員透露。
關係友好
對於劉華以《風暴》男主角挽留續約，林家棟不置可否，只強調雙方關係依舊友好：「我同佢咁多年都有曬默契，嚟緊大家仲有其他合作，只係我需要一啲新鮮嘅衝擊， management冇咗，但其他方面仲有合作，嚟緊我會俾劇本佢（劉華），大家默契仲喺度，我哋關係無變過！」林家棟說。
|
鍾意就快D Share啦！
|
|
|