熱爆娛樂: 同你死過　搶衫爭仔　許亦妮剝輸文凱玲許亦妮,文凱玲,M1,

2013年11月14日星期四

同你死過　搶衫爭仔　許亦妮剝輸文凱玲許亦妮,文凱玲,M1,

探熱針

同你死過　搶衫爭仔　許亦妮剝輸文凱玲

被踢爆搭上太陽集團高層盧啟邦的許亦妮，恃住男方公司是電影《喜愛夜蒲 3》的投資者，有份演出一角的她扮大牌又恰新人，甚至搶對手文凱玲（ Connie）私夥衫極囂張犯眾憎。

雖然許亦妮公開呼寃扮無事，但原來她是知道男友在近數月一直暗溝文凱玲，於是擺明唔妥對方，又罔顧無綫禁忌，在戲中挑機鬥剝衫，為肉壓對手，以身犯險。

其他影片

宣示主權

專釣金龜的一一年港姐季軍許亦妮，被踢爆跟電影公司高層盧啟邦撻着後，高調大讚男友叻仔，公開關係宣示主權，以為藉此可杜絕對方繼續「覓食」，當知道男友跟《夜蒲 3》中的新人文凱玲原來有來往，即時打爛醋埕。

「老細（盧啟邦）大半年前已經開始鬱手追 Connie（文凱玲），但個女仔覺得佢身邊多女又鍾意玩，其實都冇乜表示；但俾 Witney（許亦妮）知道，所以對佢態度特別差，佢哋一齊拍《夜蒲 3》，喺其他人面前冇乜嘢，但得兩個人嘅時候， Witney就唔會睬佢，除咗試過搶衫，有日 Witney見 Connie著件Ｔ恤真空上陣，就即刻同導演投訴，佢覺得自己先係女主角，唔可以俾個配角搶鏡。」劇組人員說。

10月底，許亦妮被拍到坐男友盧啟邦價值四百多萬法拉利外出。

相隔數日，文凱玲將盧啟邦的啜爆相放上微博。

自動要剝

擾攘一輪後，許亦妮竟然自動要求唔著背心，改以喱士內衣褲騷 34C出鏡，為剝贏情敵，連隨時被無綫詐型都無有怕。

「本來大家都唔明點解佢一直對 Connie咁差，初時以為佢只係唔鍾意俾其他女仔搶鏡，所以乜都爭一餐，直到張相出咗嚟（ Connie和盧啟邦嘴），先知佢視 Connie係情敵！」

收唔到科

被文凱玲以啜爆夜蒲照放微博示威還擊，但對多女的盧啟邦，許亦妮未想過要放手，只以「好驚嚇」形容啜爆相，擺明未死心留一線。可惜男友卻嬲爆：「我同佢（許亦妮）唔係拍拖。」

原來自拍拖以來，為保住有米水喉，許亦妮凡事千依百順，明知對方多女，亦採取忍字訣。

「 Andrew（盧啟邦）脾氣好大，有時甚至會當眾發脾氣，不過 Witney好忍得唔會出聲，就算明知佢有約 Connie，都唔敢同男友攤牌，所以穀埋穀埋發洩喺啲女仔身上。張（啜爆）相出咗街， Witney就算回應傳媒，都係點到即止，不過 Andrew好躁，仲即刻話要分手， Witney都唔知點收科。」知情者說。

對許亦妮男友盧啟邦一腳踏兩船追求， Connie在電話回應說：「我哋不嬲有聯絡，佢係咪追我？你哋問番佢。（知許亦妮同 Andrew分開咗？）我唔清楚喎。」隨即匆匆收線。