彭家麗與朱壽仁合唱時，仍未知這個走音主席是什麼人，只是接工作盡力做好慈善騷。
探熱針
立心不良 走音主席涉招搖撞騙 彭家麗：佢好有問題！
因在慈善騷內與歌手彭家麗合唱一曲《從不喜歡孤單一個》的朱壽仁，走音甩 beat出醜片段爆紅網上，但這個令人笑到噴飯的朱壽仁其實是「走數王」，並因擅用國際獅子會名義籌款而遭報警處理。曾被擺上枱的彭家麗更於上月二十八日出聲明，勒令對方不要再侵犯她的肖像權。
出聲明禁侵權
彭家麗與被稱走音主席的朱壽仁合唱一曲，網上點擊率高達八十萬！豈料有人打出慈善牌自肥，甚至被揭是一名超級債仔，過去多次被人入稟追數。
彭家麗接受訪問，詳述自己如何被捲入事件中。
「八月四日喺灣仔嗰個騷係代理人幫我接，講明係做慈善，但因為係第一次合作，所以我會收曬錢先做，而對方亦講過夏韶聲都係嘉賓，點知整晚完全見唔到佢，之後我有聯絡過夏韶聲，佢傳咗一份報導俾我睇，我先知道有人報咗警，話朱生搞籌款另有目的。事後佢將同我影嘅相，同喺段片 capture出嚟嘅相，放喺佢一啲私人宴會同佢嘅生日會上，而呢啲活動嘅宣傳單張又係寫明慈善籌款。佢咁做好有問題，佢冇得到我同意侵犯我嘅肖像權，咁做會誤導人哋以為我會出席呢啲活動，呢啲活動仲係收錢嘅。我已經出咗聲明，由代理人轉發俾佢，禁止佢再用我嘅肖像。」彭家麗說。
走甩夏韶聲
朱壽仁先後於今年七、八月舉辦過三場「贊助公益活動」，包括八月四日在修頓室內運動場舉行的慈善騷，走音片令他一夜紅爆，但同時也被揭發經常賴賬不找數。
據了解，原本獲邀出席當晚以保良局慈善「溫馨紅日耀關愛」的夏韶聲及裕美，於七月十二日出席記者招待會後，經理人梁小姐發覺朱壽仁口中的慈善晚會有違慈善性質，加上對方未有兌現承諾付款，因此決定不讓夏韶聲等出席活動。
「因為講明係慈善性質，佢（朱壽仁）話想幫啲貧困人士食一餐，藝人做善事所以只收車馬費，但做完七月十二日嘅記者會，就發覺有好多問題，我哋收到獅子會一封信，話整個活動同佢哋無關，加上一早講好記者會後便要俾出席活動嘅車馬費，但佢一直拖住唔俾，結果拖到八月頭先收到錢，但佢始終證明唔到八月四日係一個慈善活動，整件事好古怪，所以我哋最終拒絕出席。」梁小姐說。
拖亞視落水
據知，負責為朱壽仁的慈善活動做製作總監的前亞視藝人李浩群，正積極與亞視商討對策，揭對方打着亞視旗號自肥。
「我喺呢行咁多年，佢唔敢拖我數，亦唔會拖藝人錢，但就對 PR公司或其他無人識嘅表演嘉賓賴賬唔找數，佢又不停黐名人藝人影相，利用人哋個名去搵食。八月四日個晚會司儀原本係鄧英敏，因為發現有問題，所以鄧英敏都唔再幫佢。」李浩群說。
爆鑊
借慈善活動自肥的朱壽仁，雖然選擇性拖數唔俾，但有個別不值他所為的工作人員，即使沒有被賴賬，也挺身將其惡行公諸於世。
活動總監 Nicky：借慈善呃錢
「佢冇欠我錢，但我睇唔過眼佢嘅行為，所以做完七月十二日個騷已經冇再幫佢，藝人錢佢唔會欠，但對其他工作人員就拖數，成日黐人影合照，又話同呢個熟嗰個熟，借人哋個名嚟搞騷斂財。」
助手 Pauline：唔認賬
「佢係個用人哋嘅錢去做自己嘢嘅人，我幫咗佢唔夠一個月，搞八月一、四日個騷，布置要用嘅佢就叫我幫佢搞掂先，遲啲 claim番，到 claim錢嗰陣佢可以話『呢啲嘢我都冇叫你買』，完全不負責任，我做埋八月四日個騷，但佢一個仙都冇俾過我，會去勞工處求助。」
製作公司高小姐：佢唔肯找數
「我係經過一名闊太識佢，點知佢會咁喎！佢吹到好大，話識李慧琼（民建聯議員）、曾鈺成，政商界都搵到人，最終都係要我哋幫佢請嘉賓，個騷只係收過佢二萬蚊訂金，其他錢一概唔認數。」
|
鍾意就快D Share啦！
|
|
|
