網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2013年11月21日 星期四

志偉求林峯埋位 台慶吹雞救阿叻 志偉,陳百祥,阿叻,林峯,曾志偉,M1,




探熱針

志偉求林峯埋位 台慶吹雞救阿叻

今年無綫台慶外憂內患,由免費電視牌觸發民怨,到網民抗議電視霸權而發起的「萬千熄機賀台慶」,阿叻陳百祥為擦老闆鞋愈講愈出事,連日來不斷挑機,有網民發起台慶夜集合電視城外示威,大嗌阿叻「擦鞋至叻」。

為拯救收視,無綫突然加碼獎金獎品外,更首次吹雞全台總動員出席撐台慶。阿叻衰多口,高層亦唔生性,現任揸弗人餘詠珊為要力捧由她一手帶大的「星夢幫」鄭俊弘、王君馨等在台慶夜成為焦點,竟將樂易玲契仔林峯擺埋一邊,搞到峯少在台慶夜三日前扭計玩辭演,最後要由曾志偉出面擺平事件。

其他影片

阿叻不斷挑機,網民亦十分有反應,叫他講過一定要算數。

昨日早上十一點左右,長毛加網民總數七人到無綫示威,抗議一台獨大,要求政府發牌。

二打六都要到

無綫為抗熄機,今年台慶不單打破歷年紀錄,獎品獎金加碼至七百萬誘觀眾留低,另一邊廂,為打救連日來廢噏當秘笈,曲線叫人熄機賀台慶的阿叻,吹雞下令全台總動員返公司撐場。

「舊年公司唔俾冇表演嘅藝人返公司,今年就連二打六都要出席,仲吩咐佢哋借衫借首飾扮得靚啲;今年台慶玩人多勢眾,所有藝人要坐曬響台上,全部對住鏡頭,中途亦唔可以離場,坐足成晚。」工作人員透露。

除一班三打六,台慶亦有例牌中的巨星,譚詠麟。

謝安琪成為壓軸女歌手,在表演環節中跟阿倫對唱。

阿叻出事設法補償,最後彩排時,叫助手買西餅買雪梨,以食物「贖罪」。

圖中四個三打六,你噏得出邊個?但這不重要,發夢都估唔到有份同花旦小生一齊慶祝台慶。

大茄麥皓兒都要急召返公司撐場。

臭口叻

死撐得把口的阿叻,句句挑機辣㷫網民,熄機群情洶湧,台慶收視若暴跌,阿叻「功不可沒」。

10/11跪回家

面對網民發起台慶熄機,信心爆棚嘅阿叻以自己膝頭作抵押:「如果可以熄到得番兩、三點收視,我就跪喺度,由將軍澳跪返屋企。」

11/11跪唔夠,死埋佢!

此話一出,即刺激網民腎上腺,撐熄機網民由一萬激增一倍。點知臭口叻未識死,加多句:「如果收視兩、三點,唔係跪返去,係死咗佢。唔死都冇用啦!」

14/11淆底捐錢

眼見網民撐熄機與日俱增,知道玩大咗的阿叻暫時收口並轉口風:「若台慶收視達 30點,無綫會捐出 300萬做善事。(記:無綫答應未㗎?)我唔話得事邊個話事!」

15/11唔認數

被傳媒追問捐款建議是否已落實,自稱話得事的阿叻又轉口風:「幾時有話我捐,我只係話希望無綫捐。」

18/11臨時縮沙

台慶拜神,阿叻忽然又向網民挑機:「我好驚,不過係驚有 40點,佢哋會好冇面!」把口唔識收,但原本阿叻答應台慶日早上接受商台節目玩 phone in,與聽眾在大氣電波挑機,最終阿叻卻臨時縮沙。

阿叻躁爆

無綫努力補鑊,衰多口的阿叻卻愈講愈過癮:「我驚四十點收視,佢哋(指發起熄機網民)會好冇面。」為怕七百萬獎金獎品也留不住觀眾,無綫做足防禦措施,要求藝人台慶前一日下午兩點前返到公司做好準備,而表面扮無事繼續口臭的阿叻,據了解,連日來在電視城彩排時,全程黑面心情躁爆。

「佢平日笑笑口好多嘢講,近排就日日黑面,身邊人都唔敢惹佢,大家都覺得陳芷青講中曬,佢係真心驚。如果唔係,點會連上商台節目接受訪問都臨時甩底。」

馬明出局

全台總動員救亡,去年大熱倒灶失落視帝的林峯亦奉命撐場,與徐子珊表演「懸浮舞動派」節目。正在休假、享受同 BB拍拖的林峯,配合公司要求彩排,但後來知道「星夢幫」鄭俊弘跟許廷鏗兩個的表演環節才是台慶重頭戲,林峯當堂無癮劈炮唔做。

「林峯俾面撐公司,點知餘詠珊唔俾靚位佢出場,星夢幫先係重點,其實好多男藝人都唔順氣,不過冇人敢出聲。林峯條頸受過傷,加上佢都冇諗住續約無綫,三日前大條道理話怕再整傷條頸辭演。樂小姐勸極都勸唔掂,所以即刻搵馬(國)明頂上。今次台慶咁多嘢要煩,志偉唔想再節外生枝,阿叻已經搞到一鑊泡,所以私下幫口氹林峯,氹到台慶當日朝早,林峯先應承演出,原先替佢個位嘅馬明,即刻唔使做。」知情者說。

台前幕後甚至老友曾志偉,各自發功為阿叻臭口言論補鑊,一直死撐的他,台慶下午茶時間買定十幾打西餅安撫今晚為撐台慶收視,被迫坐足成晚做布景板的全台藝員,就算台慶收視唔跪低,阿叻的人心,也蕩然無存。

徐子珊跟林峯帶住李亞男、岑麗香等表演空中舞,因為冇高層撐住,冇得攝靚位。

星夢唱片歌手在台慶擔大旗,分量唔夠唔緊要,有高層話夠就得。

林峯為表演項目進行彩排,無綫亦有報導。

Rundown顯示,馬國明隨時 standby補林峯跳舞。

有傳欣宜不肯隨餘詠珊老公何哲圖過檔「星夢」娛樂,故原定有份跟星夢幫打頭陣演出的她,最終被叮走。



鍾意就快D Share啦!