2013年12月20日 星期五

[忽然1周 960] 最強票房演員榜 《狂野時速 6》爆冷中三元 MW,




歐洋風

最強票房演員榜 《狂野時速 6》爆冷中三元

臨近年尾,又係埋單計數嘅時候。福布斯啱啱喺周一( 16日),公布 2013年度票房最強演員榜。

你以為畢彼特、尊尼特普一定入榜?錯錯錯! Cool魔都攞唔到視帝啦,今期明顯興爆冷。

榜首位置竟然落喺《狂野時速 6》二線男星 The Rock(戴雲莊臣)身上,同劇兩位演員雲迪素及已故保羅獲加亦躋身入榜,可謂一門三傑。

一仗功成乜都得

福布斯最強票房演員榜,評審準則好簡單。純粹將演員 2013年上畫電影嘅全球票房加埋,累計總和就係結果。演員片酬、名氣,以及電影製作成本均不計算在內。

嗱,講番今次結果先。榜首 The Rock戴雲莊臣( Dwayne Johnson)由摔角手起家,憑《蠍子王傳奇》成名,雖然一路擔正,但拍親嘅多數係 B級片。 2011年佢以「男二」姿態參演《狂野時速 5》,為系列注入新元素。直至今年第 6集,系列全球大賣 7億 8千 9百萬美元,加上 The Rock之前 3套作品,累計總和竟然估佢唔到,高達 13億。即係咁,親生仔、義氣仔女固然可愛,不過識生金蛋嘅仔女,應該係最可愛囉。

由於《狂野時速 6》票房造好,令兩位男主角雲迪素( Vin Diesel)、保羅獲加( Paul Walker)同時上榜。不過保羅早前意外去世,即使榜上有名亦難免令人欷歔。惟有寄望來年《狂野時速 7》大收,到時或者有機會再連中三元。

《狂野時速 6》以雲迪素(中)、保羅獲加(右)為男主角,不過身為配角嘅 The Rock(左)異常搶戲,有指系列將會為佢開拍外傳,升呢成為男主角。

英雄有用武之地

英雄片雖然不死,但上得大枱又有幾多個?綜觀全個榜,咩超人狼人影都冇,好彩 Iron Man爭番口氣,單單一套《鐵甲奇俠 3》全球票房高達 12億,羅拔唐尼( Robert Downey Jr.) un un腳、繑埋手唔拍戲都勇奪第二位。

「雷神」基斯鹹士禾夫( Chris Hemsworth)亦不遑多讓。第二集《黑暗世界》票房青出於藍;獨自孭飛嘅《一級雙雄》亦大收近億元,比好多 A級明星更有叫座力。

講真,羅拔唐尼最煞食都係《鐵甲奇俠》同《神探福爾摩斯》系列,其餘作品表現普通。如今《鐵甲奇俠》系列完結,唔知羅拔有咩後著呢?

基斯 2014年未有作品上映,來年應該榜上無名,不過 2015有《復仇者 2》又有《白雪公主 2》,再有機會同羅拔雙雙入榜。

影後演得又賣得

榜上佔咗 8成都係男明星,女星代表只有珊迪娜布洛( Sandra Bullock)同珍妮花羅倫絲( Jennifer Lawrence)。

前者一套《引力邊緣》,後者一套《飢餓遊戲 2》,大收特收。難得兩位影後級人馬依然有 heart,分別喺今屆金球獎獲提名。

值得一提,係珍妮花兩齣作品仍喺上映階段,總計票房隨時增加,絕對有望砌低班男星,躋身更高排名,為女性爭光!

《引力邊緣》賣座,珊迪娜更憑電影角逐金球獎劇

情組最佳女主角,演技、叫座力並重。

《飢餓遊戲 2》全球票房高達 7億 3千萬,數字上已超越雷神。另外佢提名金球女配角獎嘅新作《騙海豪情》啱啱上映,排名隨時大執位。



鍾意就快D Share啦!