2013年12月20日 星期五

[忽然1周 960] 活希兒世紀大龍鳳 活希兒,MW,




唔玩大啲點見報!(設計對白)

媽咪姐

活希兒世紀大龍鳳

新娘不是我,可以點做?最近就發生前𡃁模活希兒( Fiona Braidwood)疑似著婚紗踩場嘅場面,搞到新郎哥孫道熙喺 facebook大鬧佢係「史上最踩場的賓客」,但孫媽媽(亦係 Fiona契媽)就話條裙係佢借嘅。件事咁引人入勝!媽咪姐梗係要帶大家認清呢位 Fiona嘅真面目。

周一,孫媽媽帶住新抱同 Fiona(右)喺福臨門前受訪,話一切係誤會喎!

話說活希兒來頭唔嘢小,除咗住喺市值約 1,400萬嘅大坑帝後臺外,自己仲要係一位事務律師。所以,佢不時喺 instagram同 facebook大曬富貴行頭同旅行相。雖然不愁生活,但女人當然希望搵番個富貴老公,所以深諳行奶奶政策嘅重要(你睇孫媽媽借裙一事就知)。

講番周一( 16日)場大龍鳳,除咗嚟個世紀大合照外,媽咪姐亦發現兩個亮點。第一,孫媽媽講到 Fiona著嗰條裙係粉紅色,但睇來睇去明明係白色,以活希兒咁熟 Hello Kitty,冇理由連白色定粉紅色裙著上身都唔知噃。第二, Fiona揹住嘅係過 10萬嘅 Hermès Birkin,隨時出埋糧都唔夠買袋喎。 Well,咁耐人尋味,抵你上足幾日報紙!

同款婚紗

有圖有真相,雖然孫老太話條裙係粉紅色,但點睇都係同款白色。見活希兒咁踩場法,似乎有啲唔道德囉。

真正新人

其實當日新郎哥係中港照相器材主席孫大倫細仔孫道熙(右)同潮州商會會董林鎮洪女兒林珊亭(左)嘅婚禮,活希兒只係賓客之一。

靚車出入

剛剛成為事務律師嘅活希兒,揹 Hermès,返工放工都有成 50萬嘅 Benz接載,又有媽咪做司機,完全贏在起跑線上啦。

偷坐主家席

影片畫面見到活希兒當正自己係新娘,仲喺新郎新娘跳第一隻舞時,坐埋主家席度。

評語大不同

網民對此事當然有唔同睇法,有人讚活希兒仲 keep到,但就有人攞番舊事嚟笑佢。不過,當然係負面評語居多,今次真係偷雞唔到蝕揸米。

騎馬大解放

人在外地,個人當然放啲。你睇 Fiona騎馬都可以咁性感,仲擺好曬姿勢,不愧為𡃁模出身。

曬金勞

好閃呀,係又金又石嘅 Rolex錶, Fiona最 like喺網上曬行頭。

黐 Kitty上位

搵番 YouTube,原來活希兒都做過一碟歌手,當中仲有隻黐住 Hello Kitty唱歌嘅 MV。而傳聞隻歌出咗後, Hello Kitty公仔曾一度滯銷。



鍾意就快D Share啦!