掃呢頁CODE去手機

2014年1月30日 星期四

[忽然1周 966] 剝衫搶千語飯碗  Da Da豪言:再盡啲都得 吳千語,千語,BKD_S,MW,




Da Da因情緒病自把自為玩失蹤,激嬲唔少老細,難得有人肯搵佢拍戲, Da Da自減身價之餘,仲話剝衫冇底線,看來她已經痛定思痛。

娛樂喧

剝衫搶千語飯碗  Da Da豪言:再盡啲都得

Da Da陳靜去年患上情緒病私自宣布退出娛樂圈兼玩失蹤,激到經理人施念慈噴火。

事過境遷,去年尾 Da Da開記招道歉兼全面復出,第一炮是拍攝黃百鳴投資、古天樂做男主角的《 Z風暴》。本刊收到消息,電影女角本屬意吳千語,但因角色要性感上陣兼要與拍檔演激烈牀戲,在千語扭扭擰擰之下, Da Da卻自降身價由 60萬片酬減至 40萬,成功搶去女主角。日前 Da Da開腔承認:「為咗收復失地,再盡啲都得。」

吳千語貴為黃百鳴愛將,老闆有新戲次次都會益自己人,可惜千語 BB左諗右諗,結果俾 Da Da搶咗個女主角嚟做。

憑《低俗喜劇》「爆炸糖」彈起,兼攞埋「金像獎最佳女配角」的 Da Da,身價由原來片酬 30萬升至 60萬,足足一倍,而商場活動價亦企硬 8萬,性感亮相更升至 10萬。不過由於攞完最佳女配角後,她自詡是千萬票房女星,一度「封胸」,變成有價冇市。

千語咀戲 say no

去年 8月 Da Da更以情緒病為由,私自在微博宣布退出娛圈兼旅行玩失蹤,早已接下的工作如《喜愛夜蒲 3》等臨時易角,令經理人施念慈要執拾爛攤子,兩人幾乎擘面解約。至於《喜 3》導演錢國偉更大罵 Da Da毫無職業操守。

後來,退出三個月的 Da Da「死狗」復出,聲淚俱下開懺悔記招,並向施念慈斟茶認錯。今年她全面復出,首部擔正的電影便是黃百鳴公司出品、《無間道》莊澄做監製的新片《 Z風暴》。原本 Da Da的角色是由一直受黃百鳴力捧、「天馬」旗下的千語 BB演出,不過此角色因要性感騷身材,千語 BB為保形象兼男友林峯 say no關係,遲遲未答覆電影公司。消息傳出後, Da Da極速自降 20萬片酬,由 60萬降至 40萬答允演出,搶灘成功。

據知情人士透露:「娛樂圈現實係人都知,上次 Da Da幾乎一鋪清袋,好彩阿澤(杜汶澤)、彭浩翔同晶哥(王晶)都睇佢,冇踩多腳之餘,今次黃百鳴仲俾機會佢㖭!當佢知道有機會拍住古仔演大片,點會唔𦧲飯應?佢知道呢套戲只需食番老本玩性感,同林家棟有場牀戲,簡直 easy job啦!所以決定收平啲都拍!講真千語又點會肯做呢啲角色,唔驚阿峯(林峯)詐型咩。不過電影公司原本開 75萬俾佢, BB最初都有啲心動。」

Da Da早前玩失蹤搞到《喜愛夜蒲 3》要換角,激到導演錢國偉死死嚇, Da Da最後要鞠躬道歉先收得科。

Da Da早前在電影《喜愛夜蒲》中,只穿 bra和底底在牀上和對手激戰,若然 Da Da話再盡啲,尺度上應更大膽。

黃百鳴二揀一

吳千語是黃百鳴親自捧出來,幾乎所有電影都預她一份,《 Z風暴》是一套講反貪汙的大製作,黃百鳴自然很希望「親生仔女」能參與。知情人續說:「呢個角色好有發揮,又要坐監又要俾人打,最後仲要協助古仔查案。百鳴哥當初一睇劇本,就即時諗起 Da Da同千語,因為佢覺得 Da Da做爆炸糖好出色,呢次應該難唔到佢;不過佢又想千語拍,唔好佢成日局限乖乖女形象。不過千語扭扭擰擰,咪俾 Da Da搶走飯碗。」

日前《 Z風暴》舉行記招,記者向黃百鳴求證,他只說:「 Da Da係我搵嘅,我覺得佢可以勝任。(咁千語呢?)呢套拍唔到咪下套,唔係個個角色都啱佢嘅!(咁 Da Da係咪自降片酬?)總之價錢好合理,開心價。」

而同場的 Da Da回應時表示:「我唔會再放過任何一個機會,呢個角色有發揮,我會做好佢。(咩角色都肯做?)為咗收復失地,再盡啲都得。(係咪自降身價拍呢套戲?)……你問番經理人啦,我唔知呀,我唔理自己咩價。」至於吳千語則由經理人 Carmen代答:「今年千語個期都 full,都冇期拍戲。(咁佢忙咩?)唔……傾緊好多劇本囉。」未有正面回應被搶飯碗一事。

拍古仔𦧲飯應

Da Da以往在電影中,十次有九次演花瓶角色,難得今次拍到古仔和林家棟,當然要瞓身搏盡。

問回應即閃

早前吳千語出席活動時聽到記者問到 Da Da搶飯碗一事,千語 BB只拋了句「我好忙!」即擰歪面冇睬本刊記者,交由經理人代答。

黃百鳴日前出席《 Z風暴》電影記招,坦言今次是他欽點 Da Da演出,更講明對方收「開心價」。

對於泊到大碼頭拍大片, Da Da坦言「為收復失地,可以有幾盡得幾盡。」



鍾意就快D Share啦!