掃呢頁CODE去手機

2014年1月30日 星期四

[忽然1周 966] 三大玄學家馬年大批: Sammi生馬仔 子華做老襯 陳冠希俾女飛 子華,鄭秀文,Sammi,陳冠希,黃子華,MW,




滾熱辣

三大玄學家馬年大批: Sammi生馬仔 子華做老襯 陳冠希俾女飛

馬年到喇!本刊搵咗三大玄學家李丞責、麥玲玲同吳佩孚,預測眾星來年運程。上年,除貼中「位高權重,年紀老邁的老人家(六叔)」會去世外,亦批中 Sammi安仔會拉埋天窗。

今年批 Sammi會做高齡產婦生馬仔;陳冠希、容祖兒就各有機會分手收場。三位師傅仲預測港視 7月開台順利,仲會旺爆,而 TVB則狂收投訴、收視繼續下跌。睇嚟今年娛圈將會有一番新景象。

其他影片
  • 玄學家預測 祖兒分手港視旺爆

李丞責

麥玲玲

吳佩孚

Sammi安仔有喜

被踢爆上年尾在峇里秘婚的 Sammi與安仔,新婚生活非常甜蜜,多次被本刊影到孖住跑步。咁健康,生仔應該冇難度啦!

吳佩孚:「鄭秀文雖然犯太歲,但年中同年尾好大機會有孕,要好好把握機會;安仔馬年事業會有進步,結咗婚令事業更旺。」

麥玲玲:「 Sammi馬年容易有喜,有利生兒育女。」

黃子華做老襯

吳佩孚:「黃子華屬鼠,今年犯太歲,但佢命格適合今年結婚置業,馬年結婚會有預期唔到嘅好處。」

麥玲玲:「黃子華馬年旺桃花,人緣好好,而且運氣亦唔錯,感情會有突破。」

林峯千語天作之合

吳佩孚:「林峯屬羊,馬年有喜慶,好大機會結婚,同吳千語命格八字都好夾,係天作之合。」

李丞責:「林峯事業運好好,搵到錢,未必會結婚,但同千語感情穩定。」

Eason阿徐日嘈夜嘈

李丞責:「夫妻有吵架及摩擦,雙方都要作出忍讓,雖然唔係大事,但唔可以忽視,否則家無寧日。」

麥玲玲:「感情只會原地踏步,夫婦關係麻麻。」

Edison俾女飛

吳佩孚:「陳冠希犯太歲,夫妻宮六害,今年佢冇機會結婚,馬年好大機會分手,女方會移情別戀。」

李丞責:「 Edison事業會順利,但唔會結婚,同女友感情仲會有變。」

祖兒浩龍隨時玩完

吳佩孚:「兩人感情轉淡,容祖兒未見真姻緣,經常會有拗撬,隨時玩完。」

李丞責:「雖然佢哋蛇年感情唔錯,但唔係真姻緣,馬年會有暗湧,處理得唔好,好大機會分手。」

筍盤男女

黎明有女埋身

吳佩孚:「工作運唔錯,馬年會有女埋身,但只係短暫發展,唔會結婚。」

麥玲玲:「有桃花、感情會有進一步發展。」

樂基兒有結婚衝動

吳佩孚:「馬年有機會結婚,今年行正印星,好想成家立室。」

李丞責:「有蜜運,亦係佢嘅理想對象,佢會好想結婚。」

張栢芝行桃花運

吳佩孚:「旺桃花,馬年好有人緣,事事順利,馬年行火運啱曬佢。」

李丞責:「有桃花,但屬走馬看花,真命天子仲未出現。」

謝霆鋒繼續寡佬

吳佩孚:「傷官星旺桃花,身邊大把女人,但冇一個係結婚對象。」

李丞責:「馬年會孤獨啲,不過霆鋒事業運相當好。」

港視發圍 TVB繼續跌

蛇年電視業好有火藥味,不過港視大戰無綫呢場仗仲未打完,馬年將會繼續。早前無綫突然決定終止向中移動子公司出租發射站,究竟對港視開台會唔會有影響?結果係點仲有待發展,睇嚇師傅們又點批?

吳佩孚:「王維基八字用火,馬年火旺有利,港視七月開台會順暢、精彩,對 TVB收視會有打擊,收視會繼續跌。」

李丞責:「王維基命格是非多,港視開台會旺, TVB近火,而且台徽屬金,今年會是非不斷,亦會收好多投訴。」

香港樓市、股市齊跌

李丞責:「每逢馬年,香港運氣都轉差。今年市民多投訴、多遊行,樓市股市都會下跌,如果等上樓嘅,可以趁低吸納,都算係喜訊。」

朱姓小心健康 容姓小心車禍

李丞責:「朱姓要特別注意健康,身體會出現問題。有口字部嘅姓氏,好似姓容,馬年容易惹官非,尤其小心有交通意外。」

藝人 IN& OUT

娛樂圈藝人經常「洗牌」,蛇年旺嘅藝人,未必紅到馬年。麥玲玲師傅話代表娛樂圈的兌宮有六白星飛臨,馬年實力派有得留低,得個樣冇實力嘅,馬年就要 out!

楊怡發威攞視後

吳佩孚:「出年事業運好強勁,前所未有,三合貴人局,會再攞視後。」

李丞責:「事業旺到不得了,有天悅貴人,不過感情運一般。」

陳山聰翻生成功

吳佩孚:「運氣飆升,有大貴人出現, 2014年愈來愈順,工作運亦唔錯。」

李丞責:「馬年解決曬所有問題,事業平穩發展,是非都減少,不過感情運比較差。」

苟芸慧翻身難

吳佩孚:「感情會好多嘢煩,戀情特別多,不過事業運好差,要努力啲。」

李丞責:「馬年事業會直插穀底,要努力向上爬。」

岑麗香運滯

吳佩孚:「工作運一般,感情緋聞就大把,事業差過 2013年,觀眾緣會好差。」

李丞責:「八字水旺,但人氣難以持續,仲要小心交通意外。」

娛圈旺生仔

陳慧琳難追女

吳佩孚:「下半年喜事重重,有丁有喜,不過又係生仔機會大。」

楊千嬅造人成功

吳佩孚:「馬年有子女星,生仔機會大。」

李丞責:「天喜入命,好大機會有喜。」

徐子淇第四件

吳佩孚:「三合貴人,火象,運氣好,佢今年旺丁,有喜機會大。」

李丞責:「佢嘅面相及命格都係多仔,佢今年八字嚟講絕對有機會再生仔。」

周麗淇奉子成婚

吳佩孚:「三合貴人,馬年有結婚生仔運,八字有夫宮,喜事隨時打孖上。」

李丞責:「有添丁機會,生仔機會大。」

其他影片
  • 玄學家預測 祖兒分手港視旺爆


鍾意就快D Share啦!