探熱針
擦住志偉 葉蘊儀搶贏李麗珍
氹女有一手的曾志偉，吹雞叫齊九十年代女神李若彤、李麗珍孭飛與葉蘊儀、袁潔瑩及陳慧珊五個熟女埋位拍新劇《 M Club》；多女多是非，一直有傳李若彤李麗珍爭戲份不和，殊不知黃雀在後！據知，葉蘊儀暗地發功，冧掂志偉取代李麗珍做第二女主角外，連劇集插曲都霸埋。童顏食腦，估佢唔到！
搶戲份唱插曲
曾志偉幫老友殼王搶收視，破例撻朵監製無綫新劇《 M Club》，碌卡一班九十年代影圈女星埋位，開拍以來，一直傳李若彤與李麗珍不和，但據了解，最積極爭取的是看似最無殺傷力的童顏葉蘊儀。
「咁多個女人中陳慧珊最唔理人，一來戲份唔多，平時搞活動佢唔係話湊女就係要返學冇時間；袁潔瑩份人比較爽冇乜嘢，同個個都相處到。外面話珍妹同李若彤爭戲份，其實爭嗰個係葉蘊儀！
「葉蘊儀係醒目女，好識擦志偉，成日攝位同志偉討論個角色點樣發展，傾嚇傾嚇搞到佢嘅戲份愈加愈多，最後贏埋李麗珍做咗第二女主角。李麗珍係傻大姐乜都冇所謂，俾葉蘊儀搶曬戲仲連插曲都被佢搶埋嚟唱！」一名工作人員說。
李麗珍醉曬
劇集已經煞科，但志偉仍與一班女主角保持密切聯繫。上星期二（一月七日），志偉專登包場為李麗珍和葉蘊儀搞生日派對。當晚八時半，生日主角及獲邀出席的賓客陸續出現，玩到淩晨四時多，壽星之一的李麗珍最盡興，由男友潘源良陪住的她，醉到披頭散髮，見唔到樣。
「成班人都係自己友，個個玩到好開心，志偉一點幾已經瞓低，瞓到四點幾酒醒先一齊走。錢國偉帶咗啲女仔上嚟，不過見到好多人都醉曬，所以留咗十分鐘就走咗。
「嗰晚一次過幫李麗珍同葉蘊儀搞生日會，珍妹收到好多禮物，葉蘊儀就冇乜；其實似同珍妹慶祝多啲，個個都同佢飲，所以佢都飲到好醉，好彩有男朋友睇住。」有份參與派對的人說。
你死我活
娛圈講競爭，無論男定女，大牌或二打六，只要有份落場，便有權利爭；唔爭？自己蝕底！
|
鍾意就快D Share啦！
|
|
|