椎間移位未康復，剛去完新加坡的佘詩曼，月底又要埋位拍新劇《使徒行者》。
探熱針
死性不改 無綫嚇走林依晨 阿佘捱義氣負傷頂
無綫大鑼大鼓開拍賀年單元劇《愛情來的時候》，用曬台灣日本韓國藝人做外援兼出埠拍外景，異常落本。據了解，三地外援包括台灣林依晨和韓國的池城，可惜無綫習性難改，遲遲無劇本，演員想了解開工進程卻十問九不知，加上酬勞唔吸引，最終兩人相繼唔玩！原屬池城的角色改由人氣差一截的延正勛頂上，回歸 TVB的佘詩曼亦捱義氣，幫手執林依晨二攤！
臨時劈炮
農曆年向來是收視淡季，為免收視再插水惹廣告商詐型，無綫破例於新春期間出招，開拍由四個單元組成的微電影《愛情來的時候》，搵來台灣、韓國和日本藝人合作，製造話題外，亦不計成本，移師星、馬、韓、日四個地方進行拍攝。
被鎖定的外援名單包括台劇女王、現正於英國進修的林依晨；還有憑《犀利人妻》彈起的溫昇豪、宥勝和飛輪海的炎亞綸；韓日代表是去年曾在 J2台播過、《守護波士》的池城和人氣一般的渡邊直美。
上月底，準備拍板開工之際，韓國的池城和台灣的林依晨卻先後劈炮。「台灣同韓國都唔興飛紙仔，所以佢哋一路係咁追攞完整劇本，但臨飛前兩個星期都係俾唔到，就算問啲簡單如拍外景住咩酒店？去邊啲景點拍？都無人俾到實質答案，好老實，價錢又唔係特別吸引，池城同林依晨話曬都係阿哥阿姐級，真係睬你（無綫）都傻啦。」無綫一名幕後人員透露。
重新洗牌
原本夥拍鍾嘉欣在韓國埋位的池城辭演，無綫臨急臨忙唯有搵人氣、條件差一截的延正勛頂上；而一心想同台劇女王林依晨合作，先答應犧牲陪千語 BB的林峯，知道對手變成佘詩曼後，立即唔玩冇面俾。
「其實阿佘頸椎移位未好番，月底仲要埋位拍新劇《使徒行者》，但佢都肯幫手飛去新加坡埋位，真係唔話得。」
原定由林依晨搭林峯，最終變為阿佘搭「天然呆」馬國明，面目全非！
兩大外援彈鐘，另外兩個故事包括徐子珊搭溫昇豪和宥勝（馬來西亞），以及王祖藍、炎亞綸搭渡邊直美（日本）則大步𨂾過。但無咗林依晨和池城，人腳差得遠，跌曬 watt。
縮水卡士
無綫近年收視插水，孭飛演員更加買少見少，唯一出路，靠外援！但你揀人人揀你，臨急換將，卡士縮水，習以為常。
《縱橫天地》
由王晶監製的 TVB劇《縱橫天地》（又名《風雲天地》），去年八月開拍，原先搵咗影後葉德嫻及人氣急升嘅馬國明合演，最後先知馬國明冇期， Deanie姐又甩底，結果要汪明荃和蕭正楠頂上，卡士即刻削咗。
|
鍾意就快D Share啦！
|
|
|