鍾嘉欣離奇失$3500 兩「男友」呵番
無綫花旦鍾嘉欣最近忙為無綫新劇開工，期間竟發現錢包內的3500元不翼而飛，不過她直言未有懷疑同事操守，男友伍允龍第一時間「呵番」，又大讚對方平日做事有手尾，難怪嘉欣心情並未有影響；至於緋聞男友陳展鵬亦力撐嘉欣，同聲同氣表示對同事操守有信心。
嘉欣最近夥拍陳展鵬，忙於為無綫新劇《大藥坊》開工。早前正值農曆新年，嘉欣到櫃員機提款6000元準備「萬歲」，結果埋單後發現餘款「無故失蹤」，前晚她悉心打扮，性感「中門大開」出席「加昇駿馬迎新歲新春晚會」時接受訪問，談起「離奇失竊」不禁發嬌嗔謂：「嗰日請大家食pizza，埋單2000幾蚊啦，跟住嗰幾日都冇點用過錢，銀包大概約有3500蚊左右，點知有日走去超級市場買生果，畀錢時打開個銀包，先發現得番150蚊咋！」
「咪當買咗個教訓」
嘉欣事後百思不得其解：「有懷疑過畀人偷咗，亦唔知係咪自己大意跌咗，總之個銀包只係放喺自己個隨身開工篋度。（唔報警？）當時拍緊外景，所以冇搞，咪當破財擋災囉。（有冇擔心過同事手腳唔乾淨？）冇，我亦都冇唔開心，以後叫自己小心啲好過，自己嘅嘢梗係要自己負責，我唔會去懷疑人哋，咪當買咗個教訓囉，以後啲貴重嘢都係交畀助手保管好啲。」而剛過去的雙料情人節，嘉欣默認過得相當開心，難怪有感「錢財身外物」。
陳展鵬自稱失憶王
身為嘉欣男友的伍允龍，自然第一時間得悉「離奇失竊」一事，他昨晚接受電話訪問謂：「佢有同我講過，我叫佢搵清楚啲先，搵唔到都唔緊要，第二時會搵得番o架嘞。（買份禮物氹番佢？）唔使嘞，其實嘉欣本身係個小心嘅人，做嘢有手尾。」至於身為《大》劇男主角兼嘉欣緋聞男友的陳展鵬，得悉嘉欣有損失後說：「我唔知喎。（叫佢小心啲？）佢都有助手啦！其實我有時都會將個銀包放喺公司架小巴上，以後都要盡量小心啲。嗰啲錢好難追得番o架嘞，咪當破財擋災囉，呢啲事間中都有聽聞。（擔心公司同事手腳唔乾淨？）我對同事操守好有信心。最近我畀大家封咗個名叫『失憶王』，成日都唔記得啲嘢放喺邊，都係時候請番個助手嘞。」
文：影視組
|
鍾意就快D Share啦！
|
|
|
