馮仁昭四圍超:秋生寸成龍 出𤓓事書 - 馮仁昭
黃秋生同葉童噚日喺西環出席電車公司慶祝110周年嘅記者會,秋生曾經因為選演藝人協會會長同演協秘書長陳芷菁起爭執,最後秋生宣佈棄選,噚日問秋生𠵱家由成龍做會長呢件事,佢話:「咁咪好囉,佢德高望重,不過佢早啲出聲仲正,唔使我搞到一褲都係!」
之不過成龍經常失言,最近仲認錯咗威廉王子係哈里,搞到成為國際笑話,秋生就話:「精采呀,可以出番本紀念冊,我憑乜嘢教人呀?你哋唔好玩我啦!」秋生又話收到訊息,加入演協唔使交會費喇,不過冇興趣參與會務,因為身為藝發局委員嘅佢話藝發局已經好多會要開喎。
葉童難忘禁片
葉童就爆老公陳國熹追佢時都有遊電車河,因為大把時間傾偈夠浪漫喎。葉童仲話第一部戲《烈火青春》,因為湯鎮業同夏文汐嘅大膽激情戲喺電車上拍,結果搞到被禁,好在兩個月後套戲重新剪接上到畫咋!
撰文:馮仁昭
鍾意就快D Share啦!
|
|