盛男想識兩位頭號女神，可惜無綫最後都唔畀，如果有佢兩位肯定收視高好多。
真面目
花旦冇到 照抄《非誠勿擾》 TVB阻嘉欣香香溝仔
求愛節目一向高收視，上年嘅《求愛大作戰》收得多話題，下週推出的《搵個好男人》又抄橋，抄足江蘇衞視皇牌節目《非誠勿擾》，點知班入圍盛男個個鬼咁識揀，全部想借呢個機會識鍾嘉欣、岑麗香。據知，主持阮兆祥原先都想請兩大女神作嘉賓，可惜高層唔肯放人，惟有靠高海寧、黃心穎撐住！
《盛女愛作戰》及《求愛大作戰》收視好之餘，亦成功製造話題，而內地真人騷《非誠勿擾》爆紅多年，無綫改少少橋，自家製的《搵個好男人》就下週一（ 24日）首播。
才藝表演玩催眠
《盛》同《求》收得因為製作認真，但《搵個好男人》就即食格局，雖然有公開招盛男，但據知入圍盛男，大部分都係婚姻介紹所客仔，其中《盛》顧問 Mei Ling嘅婚姻介紹所更係大戶。
由於可以溝明星，唔少盛男都爭住去，所以質素都唔差，有健身教練、補習天王、基金經理等中產。不過節目製作就快餐式，一星期拍完， 20集有 16位女星對 32位盛男配對，每星期 8位盛男對 4位女星，參賽盛男喺節目中同女星透過傾偈認識，之後有才藝表演，唱歌、魔術咩都有，仲有人表演催眠，到最後先有機會同心目中女神表白，玩法同《非誠勿擾》非常相似。
除咗頭 5集女星外，其餘 3組都安排一位重口味女星，分別係細細粒、李漫芬同蝦頭。以為佢哋冇人爭，但原來有參賽者想識細細粒，有人揀李漫芬，唔揀黃心穎，真係估唔到班盛男口味。
|
鍾意就快D Share啦！
|
|
|
