2014年3月13日 星期四

[壹週刊 1253] 投資Ⅲ片 古天樂落場砌 AV女 古天樂,M1,





自摸

檔期排到密麻麻,古天樂仍抽空飛到日本,為自己投資兼監製的《 3D豪情》客串。

探熱針

投資Ⅲ片 古天樂落場砌 AV女

做幕前唔可以做足一世,深明此道的古天樂,一方面投資後期製作公司,與謝霆鋒的「 Po朝霆」爭飯食,另方面仲做埋電影基金「揸 fit人」,先後投資作品包括《逃出生天 3D》、《掃毒》及《金雞 SSS》。

轉型做老闆,對於○三年首次做監製的電影《豪情》開續集,古仔更加出錢再出力,做幕後金主兼監製外,更親自落場,與一二年銷量 No.1的 AV女王由愛可奈埋牙肉搏。

話事人
入行廿年,古天樂見盡不少電影人因缺乏資金,令創作計劃胎死腹中。年前,古仔搵到國內水喉,集資成立「穀樂樂」電影基金,古仔做「揸 fit人」,拍板投資開戲。撞正老友陳慶嘉計劃開拍《 3D豪情》,並遊說他再做監製及幫手碌卡搵串星,睇完劇本,古仔認為值得投資,決定沾手。

○三年同陳奕迅合演《豪情》,古天樂首次做監製,當年電影票房收超過八百萬。

追逐

古仔同多名全裸 AV女追逐,恨死不少熱捧 AV的麻甩佬。

生擒

當正自己拍 AV的由愛可奈,出盡絕招對古仔上下其手,搞到古仔要搵翻譯傳話,叫對方「手下留情」。

益君如
今時今日的古天樂,片酬千二萬起跳,導演陳慶嘉捉鹿脫角,叫老闆落場客串,安排他飾演 AV界男優「江門古天樂」。另一邊,答應吳君如在《金雞 SSS》做「鴨仔」的他,索性叫自己做「江門古天樂」,角色由《金雞 SSS》引伸到《豪情》,計曬數!

出錢又出力的古仔,去年十一月更唧出寶貴檔期,撲去日本埋位。古仔戲中對手是另一 AV男優杜汶澤。杜汶澤獨享「人類最強 body」、 L奶 AV女優沖田杏梨,古仔則與二○一二年人氣女優銷量 No.1由愛可奈,再加多五個 AV女,一王六後埋牙肉搏。

導演一嗌 roll機,六個 AV女一擁而上,與古仔在房內你追我逐,之後由愛可奈更露出 34E招牌巨乳,壓向古仔再上下其手。絕招盡出,令古仔完全招架不住。

「啲女優真係好放,好投入,豁咗出去,當正自己拍真 AV咁,拍完一 take,我叫翻譯同佢(由愛)講,唔使咁『行』!」古仔說。

《掃毒》

過去兩年,古仔先後投資三部電影,全部有份落場演出。

《逃出生天》

《金雞 SSS》

有反應
古仔難敵 AV女專業,阿澤反而佩服工作人員的定力。話說阿澤要拍一場頭頂沖田杏梨的 42L胸,為保持平衡,其中一名男工作人員負責扶實上半身全裸的沖田,阿澤抵死說:「工作人員最難受,男人嚟㗎,對到實望到正,拍足個幾鐘,都幾難頂。」

AV氹氹轉,對於「動 L」出現生理反應,杜汶澤好坦白:「呢個必然,人類身體構造非我控制,香港拍會驚對手尷尬,但日本人覺得如果我無反應,係咪佢哋有問題?覺得自己做錯。」



戲中古天樂要扮可愛跳舞,令他頻頻 NG。

到日本開工首日,阿澤便要頭頂 42L的沖田,但阿澤反而同情要扶實沖田的工作人員。

除了沖田杏梨,阿澤跟另一 AV女辰巳唯亦有多場對手戲。

神級 AV男加藤鷹在電影中客串,教杜汶澤 AV秘技。

阿 Sa同吳君如應邀在《 3D豪情》客串,吳君如會做回《金雞 SSS》的阿金。

我要做老闆
投資開戲風險高,唔少藝人攞血汗錢拍戲做老闆,最後血本無歸。

何超儀

10年,何超儀憑首部投資作品《維多利亞壹號》,成功奪得西班牙影後兼打入荷李活市場;雄心壯志的她,之後再掟 500萬投資《復仇者之死》,可惜票房仆直,票房得 80萬,但對於賭王何家千金而言,濕濕碎。

劉德華

創立「天幕製作公司」的劉德華,歷年投資多部電影均損手離場,幸有《打擂台》及《桃姐》先後奪金像獎最佳電影,終於令劉老闆名利雙收,去年再下一城,與安樂江志強合作開拍警匪片《風暴》,全國票房衝破 3億。

麥浚龍

Juno有富老豆麥紹棠撐腰, 12年豪擲 1,500萬自資做導演,開拍電影《殭屍》,累積票房近 2,000萬港元,贏票房更贏口碑。


鍾意就快D Share啦!