探熱針
一肚氣 怪經理人偏心 陳展鵬唔妥蕭正楠
做極都只算係二線頭的蕭正楠和陳展鵬，去年齊齊孭飛無綫劇集《巨輪》，攀越一線尾。不過，交際手段稍遜的陳展鵬，卻不如拍檔蕭正楠般得到曾勵珍和樂易玲歡心，獲兩大高層對外稱許。
偏偏兩人同屬一個經理人旗下，但蕭正楠不單有較多賺錢 job，更有機會拍王晶監製新劇《風雲天地》，又可以拍個人音樂特輯，陳展鵬一肚氣，並向人埋怨經理人大細超。
有心病
無綫小生、花旦嚴重流失，造就一班二線藝人水鬼升城隍，有機會做主角，最佳人辦有蕭正楠和陳展鵬。
去年二人一同孭飛合作劇集《巨輪》，有傳因為蕭正楠對外聲稱自己是第一男主角，令陳展鵬甚感不滿，二人開始有心病。
「煎 pan（陳展鵬）拍鍾嘉欣，照牌面睇佢先係第一男主角，不過阿 Win（蕭正楠）有珍姐同樂大媽撐，俾膽佢喺外面話自己係男一，煎 pan穀住道氣，雖然佢冇公開嘈曬，但都有同兩、三個幕後呻過。」一名幕後人員說。
冇人吼
《巨輪》之後，劇中做好仔的蕭正楠入曬屋，商演、活動數量大增；反而見報率較高的陳展鵬無人吼！
搵銀機會不及人之外，當陳展鵬收到風知道蕭正楠有份演出王晶監製的合拍劇《風雲天地》後，更加認定經理人 Kenneth大細超，好嘢全部益曬同組的蕭正楠。
「煎 pan同過幾個監製呻過，話經理人偏心阿 Win，但事實大家都有眼睇， Kenneth每次都係安排佢兩個一齊出 function，只係阿 Win比較入屋，啲客點名搵佢，俾錢嘅話事，經理人都控制唔到；阿 Win可以拍晶哥套劇都係一樣， Kenneth只係度期配合，佢根本影響唔到晶哥用邊個演員，咁又點算偏幫呀！大家聽完反而覺得煎 pan小家！」知情者說。
重見天日
陳展鵬雖然不及蕭正楠受客戶歡迎，但仍獲高層曾勵珍歡心。
原由吳卓羲、蒙嘉慧擔正的新劇《叛逃》，陳展鵬因為冧得掂珍姐，戲份獲一加再加，可惜其時（一一年）曾勵珍陣營的劇集收視連挫，《叛逃》被迫抽起變倉底貨。因為陳展鵬要坐歪的吳卓羲曾語帶雙關：「我實賴佢（陳展鵬），嗰陣傳珍姐加佢戲份力捧，我冇乜戲㗎，所以唔關我事！」
劇集收埋兩年，如今曾勵珍獨攬大權，《叛逃》已安排出街，陳展鵬投向曾勵珍，總算無押錯注！
|
鍾意就快D Share啦！
|
|
|
