掃呢頁CODE去手機

2014年4月10日 星期四

[壹週刊 1257] 樂易玲改約減糧 賤價趕絕楊思琦 思琦,楊思琦,樂易玲,M1,




探熱針

樂易玲改約減糧 賤價趕絕楊思琦

兩年前未婚生 B的楊思琦,要獨力撫養囡囡卓穎,要供樓仲要養埋已經退休的父母,每月開支不輕,即使已為人母,三十六歲的楊思琦為生計,咬實牙關拋胸接商演做酒吧騷,撲水養起成頭家。

唔得寵!又被公司嫌棄大話形象差,加上得罪了藝員部揸 fit人樂易玲,導致楊思琦近年不斷被削減工作量。據知,無綫對年中約滿的楊思琦提出改簽普通藝員約,比以前「親生女」時期的經理人約,人工大幅度減低。

被逼上絕路,楊思琦相當頭痛,擔心得番唔夠兩萬月薪,難以負擔家庭開支,近日四出放風𢱑撈,誓要脫離無綫支配。

發茅𢱑撈

兩年前,楊思琦飛起男友李泳豪,為吳帥未婚產女,結果被對方拋「妻」棄女。變成單親媽咪,獨力搵錢養女唔容易,身為經理人公司的無綫,不單未有雪中送炭,還嫌棄她大話及單親形象唔健康,加上由「思琦妹」變「思琦媽」,純情角色難有說服力,幕前工作少,搵快錢機會更少。為生活,楊思琦唯有拋胸返大陸夜場做酒吧騷。

據了解,入不敷支的楊思琦曾多次打電話給樂易玲,要求公司安排更多工作給她。

「思琦啱啱生完復工嗰陣,樂小姐拍曬心口叫佢唔使擔心,會盡量安排適合嘅 job俾佢。點知得個講字,冇劇拍不特止,咁耐以嚟,只係安排過兩三個騷俾佢,之後就乜都冇。思琦搵親樂小姐,佢都話唔得閒,之後樂小姐仲好唔客氣咁話冇監製肯用佢,踩到思琦地底泥咁,話唔知仲有乜可以俾佢做,思琦聽完發曬茅,鬧番樂小姐冇信用唔理佢、唔幫佢。」楊思琦身邊人說。

楊思琦 11年懷有吳帥 BB,在洛杉磯待產期間,突然與男友分手,成為單親媽咪。

被拋棄的楊思琦,與女兒楊卓穎相依為命,供書教學全部一腳踢。

變做甘草

以下犯上,自此,楊思琦更加被投閒置散。知道自己冇運行,楊思琦於是掉轉槍頭,投靠樂易玲的死對頭、掌管綜藝節目的余詠珊。

最初余詠珊表現積極,安排楊思琦參加《星夢傳奇》,又幫手主持《 May姐有請》,但外界對楊思琦反應普通,加上余詠珊有太多「自己人」要幫,即使楊思琦投誠,無補於事。

得罪樂易玲,余詠珊又愛理不理,楊思琦進一步降級,在新劇《大藥坊》中要做鍾嘉欣的細媽,作為填補被王維基大批挖角到 HKTV的甘草空缺,戲份極少。

停了接近四年冇拍劇,去年無綫才安排她在《廉政行動》(左圖)中客串,以及做甘草演員,在《大藥坊》中扮演鍾嘉欣後母,但現實中楊思琦只大鍾嘉欣五年。

最近無綫召見八十位藝員,要他們向高層自我介紹,從而決定他們去留及加減薪命運,不過楊思琦未被他們安排今次會見。

減人工

今年七月滿約的楊思琦早前被安排傾續約,但樂易玲並無出面,只派出一位負責普通藝員合約的職員何其穎與她面談,楊思琦要轉簽普通藝員約外,人工還大幅削減超過三分一,由原本月薪三萬,減到唔夠兩萬。

「樂小姐開會嗰陣有提到唔會再同思琦續經理人合約,佢話思琦依家冇乜 job,又唔聽話,唔應該再簽經理人約,轉番做普通藝員適合啲。其實簽經理人合約嘅有大把人工作量同知名度低過思琦,但都可以留低,講到尾係思琦之前鬧過佢,所以有手尾。」知情者說。

要養家要供樓,有數得計!楊思琦至今遲遲唔肯動筆簽約,更四出向其他電視台敲門,希望可以搵到出路,脫離無綫。

問到楊思琦對前景是否擔心?她說:「唔太擔心,隨遇而安,都唔會覺得失去一啲嘢,就會世界末日。」

產後剛坐完月,無綫即安排楊思琦著泳衣拋胸濕身做節目。

曾幾何時,無綫都有重視過楊思琦,當她由洛杉磯返港時,樂易玲加埋曾醒明等共五人去接機。

無綫冇乜工作安排,楊思琦唯有狂接酒吧 show,其間難免要被酒客抽水。

因為 HKTV開台無期,令到無綫繼續獨大,早前譚玉瑛就被無綫調離兒童節目組,變相逼她自然流失,結果引起公憤,無綫執行董事集團總經理李寶安在出席立法會資訊科技及廣播事務委員會時,被人質問:「你做乜搞譚玉瑛?」搞到李寶安發火回應:「我哋冇搞佢,特別我冇搞佢!」之後譚玉瑛即獲無綫續約,更補鑊安排她做《東張西望》主持。

(《蘋果日報》圖片)

重負擔

01年港姐冠軍楊思琦,初出道便擔正做女主角,與同期的佘詩曼、郭羨妮鬥得你死我活,加上唔錫身肯拋胸,登台、代言人、泳衣 show大小通殺,高峰期月入超過十萬,並先後買入多個單位投資。直至 12年未婚產女,復出後形象插水,收入大減;要供樓養女養父母,好襟計。

唔好得罪大媽

掌管經理人部門的樂易玲,一度大權在握,愛將受力捧,反之,入冷宮食風,馬德鐘老婆曾在微博以「樂大媽」稱呼她,又寸樂易玲說話欠大體。

馬浚偉

曾經暗示被樂易玲打壓,主演劇集被安排「炮灰檔」播出,提名視帝又次次「食白果」,於是主動解約返內地搵食,可惜接拍內地劇《建元風雲》後長期坐冷板,要返無綫𢱑撈,被壓價至一萬蚊一集,更冇資格揀劇拍。

王喜

在無綫 16年的王喜因為撐陳志雲而得罪樂易玲,工作量大減,被安排在處境劇《天天天晴》中做二打六,公司其後向他提出賠錢解約,與他提早「分手」。

廖碧兒

「迷雲黨」之一的廖碧兒,曾自爆因為弄傷腰骨向公司請假,卻被質疑講大話,矛頭直指樂易玲,加上當時被指拜金、形象插水、主演的電視劇收視仆直,即使主動向無綫提出凍薪續約兩年,公司依然冇反應。



鍾意就快D Share啦!