探熱針
樂易玲改約減糧 賤價趕絕楊思琦
兩年前未婚生 B的楊思琦，要獨力撫養囡囡卓穎，要供樓仲要養埋已經退休的父母，每月開支不輕，即使已為人母，三十六歲的楊思琦為生計，咬實牙關拋胸接商演做酒吧騷，撲水養起成頭家。
唔得寵！又被公司嫌棄大話形象差，加上得罪了藝員部揸 fit人樂易玲，導致楊思琦近年不斷被削減工作量。據知，無綫對年中約滿的楊思琦提出改簽普通藝員約，比以前「親生女」時期的經理人約，人工大幅度減低。
被逼上絕路，楊思琦相當頭痛，擔心得番唔夠兩萬月薪，難以負擔家庭開支，近日四出放風𢱑撈，誓要脫離無綫支配。
發茅𢱑撈
兩年前，楊思琦飛起男友李泳豪，為吳帥未婚產女，結果被對方拋「妻」棄女。變成單親媽咪，獨力搵錢養女唔容易，身為經理人公司的無綫，不單未有雪中送炭，還嫌棄她大話及單親形象唔健康，加上由「思琦妹」變「思琦媽」，純情角色難有說服力，幕前工作少，搵快錢機會更少。為生活，楊思琦唯有拋胸返大陸夜場做酒吧騷。
據了解，入不敷支的楊思琦曾多次打電話給樂易玲，要求公司安排更多工作給她。
「思琦啱啱生完復工嗰陣，樂小姐拍曬心口叫佢唔使擔心，會盡量安排適合嘅 job俾佢。點知得個講字，冇劇拍不特止，咁耐以嚟，只係安排過兩三個騷俾佢，之後就乜都冇。思琦搵親樂小姐，佢都話唔得閒，之後樂小姐仲好唔客氣咁話冇監製肯用佢，踩到思琦地底泥咁，話唔知仲有乜可以俾佢做，思琦聽完發曬茅，鬧番樂小姐冇信用唔理佢、唔幫佢。」楊思琦身邊人說。
變做甘草
以下犯上，自此，楊思琦更加被投閒置散。知道自己冇運行，楊思琦於是掉轉槍頭，投靠樂易玲的死對頭、掌管綜藝節目的余詠珊。
最初余詠珊表現積極，安排楊思琦參加《星夢傳奇》，又幫手主持《 May姐有請》，但外界對楊思琦反應普通，加上余詠珊有太多「自己人」要幫，即使楊思琦投誠，無補於事。
得罪樂易玲，余詠珊又愛理不理，楊思琦進一步降級，在新劇《大藥坊》中要做鍾嘉欣的細媽，作為填補被王維基大批挖角到 HKTV的甘草空缺，戲份極少。
減人工
今年七月滿約的楊思琦早前被安排傾續約，但樂易玲並無出面，只派出一位負責普通藝員合約的職員何其穎與她面談，楊思琦要轉簽普通藝員約外，人工還大幅削減超過三分一，由原本月薪三萬，減到唔夠兩萬。
「樂小姐開會嗰陣有提到唔會再同思琦續經理人合約，佢話思琦依家冇乜 job，又唔聽話，唔應該再簽經理人約，轉番做普通藝員適合啲。其實簽經理人合約嘅有大把人工作量同知名度低過思琦，但都可以留低，講到尾係思琦之前鬧過佢，所以有手尾。」知情者說。
要養家要供樓，有數得計！楊思琦至今遲遲唔肯動筆簽約，更四出向其他電視台敲門，希望可以搵到出路，脫離無綫。
問到楊思琦對前景是否擔心？她說：「唔太擔心，隨遇而安，都唔會覺得失去一啲嘢，就會世界末日。」
重負擔
01年港姐冠軍楊思琦，初出道便擔正做女主角，與同期的佘詩曼、郭羨妮鬥得你死我活，加上唔錫身肯拋胸，登台、代言人、泳衣 show大小通殺，高峰期月入超過十萬，並先後買入多個單位投資。直至 12年未婚產女，復出後形象插水，收入大減；要供樓養女養父母，好襟計。
唔好得罪大媽
掌管經理人部門的樂易玲，一度大權在握，愛將受力捧，反之，入冷宮食風，馬德鐘老婆曾在微博以「樂大媽」稱呼她，又寸樂易玲說話欠大體。
馬浚偉
曾經暗示被樂易玲打壓，主演劇集被安排「炮灰檔」播出，提名視帝又次次「食白果」，於是主動解約返內地搵食，可惜接拍內地劇《建元風雲》後長期坐冷板，要返無綫𢱑撈，被壓價至一萬蚊一集，更冇資格揀劇拍。
|
鍾意就快D Share啦！
|
|
|