為救亞視變身美魔女 47歲潔儀姐姐整容谷胸
那邊廂兒童節目元老譚玉瑛被無綫踢走，無奈轉職做顧問，再焗簽藝員合約；這邊廂亞視兒童節目《精靈一族》的長腿姐姐袁潔儀，不惜割雙眼皮兼谷胸，以全新美魔女形象高調回歸亞視主場，擔任全新婦女資訊節目《閒情．誌》（暫名），博盡救亞視。
撰文：黃曉妍
■47歲的潔儀姐姐大騷「事業線」回歸亞視，令人眼前一亮。攝影：葉君海
亞視爭取續牌，今年要增加自家製作，除了一年前高叫開劇，最近終於有新節目落實，還找來有亞視長腿姐姐之稱的袁潔儀擔任主持，亞視今次度身訂做一個全新婦女資訊節目《閒情．誌》，成功冧得潔儀姐姐簽約1年。
助夫打理生意
譚玉瑛姐姐被踢出局，曾經是過來人的潔儀姐姐都有留意，日前她接受專訪時，說：「我覺得佢幸福，因為好多人支持佢，我覺得佢會有一段時間幾難平復，好似友台會安排另一啲節目畀佢，當有嘢做嘅時候，就好快會適應呢個突變，我當年都遇過呢個情況，我做咗7年兒童節目，有一日，我開完廠，錄曬音，編審同我講今日係我最後一日廠，我個心都會沉咗一沉，編審話：『唔好意思，上面咁樣安排，全部改成小朋友做，冇大人做。』當時我好唔開心，我都要生活，我咪出去闖，開始返內地周圍演出，後來仲識咗我老公，所以命中注定有得就有失。」
潔儀姐姐早年嫁到廣州跟丈夫一齊打理農務生意，多年沒有在幕前工作，坦言感到不知所措，不過，眼前闊別多年的潔儀姐姐似乎狀態大勇，47歲的她，神采飛揚，穿上低胸長裙，露出一條深長的事業線，她說：「咁耐冇對住攝影機，我驚會有空白感覺，所以我提醒自己唔好咁緊張，順其自然，但係興奮偏多，希望可以盡量做好節目，表現有番水準先，好唔好就等大家畀意見再改進。」對於亞視近年人才盡失，回歸是否幫手打救亞視？她說：「我幫唔到啲乜，係因為人情味，佢願意用我，我當然要支持。」
■當年主持《精靈一族》時，潔儀姐姐深受小朋友歡迎。
■袁潔儀89年憑一雙修長美腿參選亞姐而入行。
資料圖片
■長腿袁潔儀憑運動保持健美體態。
自爆整雙眼皮
談到婚後定居廣州的生活，潔儀姐姐笑得特別甜，她說：「我好似打雜、工人，不過非常之開心，因為我有老公錫。」潔儀姐姐今次重返幕前得到老公全力支持，她說：「我覺得要支持嚇亞視，所以好簡單地簽咗合約，而我老公亦都好支持。最重要係我一星期開兩三日工，同我兼顧家庭冇乜衝突。」
歷代亞姐保養得宜，隨意一數，都是美魔女，好似羅霖、萬綺雯、伍詠薇，包括面前的潔儀姐姐：「盡量食得清淡，主要做運動，早睡早起。」以為潔儀姐姐都是得天獨厚，她卻突然自爆曾經整容：「我想整扁平疣，最近有人贊助我整雙眼皮，選美嗰陣，眼皮唔係太雙，搞到我成日要用膠水黐，嗰個人好簡單用吊針幫我整雙眼皮，遲啲代言廣告會出街，我好驚訝𠵱家美容技術咁好。」
|
鍾意就快D Share啦！
|
|
|
