受離婚官司困擾 對男人失信心 羅霖拒要贍養費： 唔想糾纏落去
2014-04-07 15:35:00
羅霖話法庭批咗暫准離婚書。(攝影：黃偉雄)
現年48歲嘅美魔女羅霖，近日因為同前夫劉坤銘嘅離婚官司，上咗雜誌封面，報道指佢收唔到前夫劉坤銘贍養費。
今日羅霖出席活動嘅時候，又再講到呢件事，佢話：「唔想做封面，做親冇好事，雜誌講嘅多發揮空間，對某人嚟講，筆錢係贍養費，我覺得係唔夠爭我嘅一半，各人觀點角度唔同，和解上唔提呢筆錢，我角度係一毫子都冇，佢有佢講，我有我講。」
有冇問前夫拎贍養費？羅霖話：「唔會，唔想糾纏落去，唔需要錢，希望用愛、包容態度解決，官司係精神壓力，想卸下包袱專心工作、湊仔，但佢兩年幾到0依家唔肯簽。」
羅霖話估唔到點解唔簽，連佢律師都唔明，問已屆法定年期，係咪正式離婚？佢話：「法庭批咗暫准離婚書，三個仔共同撫養，跟我生活，但佢唔肯租屋畀我，所以我唔可以同三個仔一齊住。」
羅霖話對男人冇信心，覺得女仔應該有獨立經濟能力，咁0依家經濟狀況點？佢話ok，仲開始傾生意。
羅霖仲話官司係精神壓力。
劉坤銘唔肯租屋畀羅霖，所以要佢哋母子分開住。(資料圖片)
|
鍾意就快D Share啦！
|
|
|
