志雲出手幫拖 前助導數臭無綫
無綫一台獨大，不少幕前幕後員工就算被公司欺壓，往往也因為要保住飯碗而敢怒不敢言。不過，近日有位化名為偽文豪的無綫前助導（PA）出書數臭無綫，大爆無綫黑幕及如何刻薄！在《TVB血淚屎》中，偽文豪又大爆無綫小生「Chok峯」及「臭蝦哥」經常爆粗鬧人，臭蝦哥還嫌替身周身汗臭趕人落車極冇品，明寸林峯及吳卓羲。至於無綫前總經理陳志雲則為其新書寫序幫拖，無懼得罪無綫。
化名偽文豪的無綫前助導，去年開始在facebook狂數無綫而引起出版商注意，力邀他出書。在偽文豪下周一推出的《TVB血淚屎》中，不少內容是轉載其fb內容，其中偽文豪大爆07年在無綫任職7個月PA時的辛酸史，他更強調是百分百真確。內容包括日日做到天昏地暗沒有私人生活，導致女朋友離他而去，還要日日被人粗口問候，又指有同事兄長過身，無綫竟然只准同事放兩日喪假兼即刻返工。拍古裝劇《大冬瓜》時，明明清楚註明要唐狗作道具，但無綫有人卻找來金毛尋回犬頂上，十分求其。
■無綫前助導偽文豪指不少人覺得邵逸夫時代較有人情味，現則諸多膠行。資料圖片
■無綫前助導偽文豪出書數臭無綫，還揭穿不少藝人假面具。
電視台得七成好人
不過，偽文豪除大爆無綫如何刻薄外，最叫人感到興趣的，是他以揞名形式大爆無綫小生「Chok峯」爛口及「臭蝦哥」如何無品。偽文豪指在7個月的PA生涯中，曾參與的劇集包括由林峯、吳卓羲及馬國明等主演的《少年四大名捕》，以及廖啟智、陳錦鴻及蘇玉華主演的《大冬瓜》，曾有一位唱過《別怪蝦》的小生「臭蝦哥」，對住監製時如比卡超對主人般非常溫順聽話，但一對住其他人則化身囂屎男大講經典奸佬對白。偽文豪指一次服裝姐姐幫臭蝦哥著古裝衫時，不小心拮親他，臭蝦哥即大聲爆粗說：「好X痛呀！」之後全程黑口黑面。
偽文豪又爆臭蝦哥嫌棄替身，極之無品：「佢（臭蝦哥）呢種演員咁識做戲，又身嬌肉廢，所以武術指導幫佢搵咗個替身，幫佢處理一啲較難動作場面。拍完後，個替身跟埋我哋一齊坐服裝車走，由於那位替身幫完臭蝦哥打咗一輪，所以身水身汗，以致車入面都可以聞到佢陣汗味，架車行咗一陣之後，有一工作人員要在某處落車，臭蝦哥突然大大聲話：『喂！啲臭人唔該落車先啦，好很臭呀！』」除臭蝦哥外，偽文豪又大爆「Chok峯」爛口：「你是個不錯的人。除了粗口比較勁，有時講嘅嘢有啲刺耳之外，你個人都算冇咩架子，係一個正常人，不過麻煩下次唔好一見我就問候我媽媽。」雖然偽文豪未有開名，但主人翁吳卓羲及林峯已幾乎呼之欲出。
在新書序言中，偽文豪謂：「呢本書除咗娛樂讀者，利用我悲慘嘅經歷畀大家消費兼嘲笑之外，我想表達嘅，係電視台嘅惡性文化如何一代一代循環：高職位虐待低職位，然後當低職位晉升高職位，便開始虐待低職位……喺我接觸到嘅電視人裏面，有70%係好人，有30%係PK……」最後，他還向無綫「致敬」說：「食X啦你！」
■林峯（左）及吳卓羲被無綫前助導明寸愛爆粗，未知兩位小生如何拆彈。資料圖片
■陳志雲倒戈相向，為偽文豪新書寫序。資料圖片
志雲：有啲可能係事實
另一樣引人注意的，是《TVB血淚屎》竟邀得無綫前總經理陳志雲寫序，記者昨致電志雲，原來他不認識偽文豪，只是由商台《1872遊花園》前主持阿Bu提出幫手。難道不怕得罪無綫？志雲說：「唔怕！佢（偽文豪）睇到、佢講嘅係咪事實我唔知道，有啲可能係事實，有啲可能係創作，有種物體叫faction，事實撈埋一啲創作小說，我就由呢個角度去睇，一來係我前同事推介，二來作為一個年輕人，佢想寫一本書娛樂嚇大家，又無妨呀，雖然佢寫嘅嘢我唔係完全睇得懂。任何人肯出一啲力去創作，我諗我哋喺呢個行頭都應該支持嚇。我相信佢裏面有啲創作空間喺度，增加娛樂性，大家唔好對號入座，當一本娛樂消閒書、睇嚇得啖笑。」
採訪：白白
■偽文豪曾在無綫工作7個月，跟過劇集《少年四大名捕》。劇照
【是非滿瀉】
公仔箱向來是非多多，如果要爆料嘅話，可能出本特刊都講唔曬，關仁就精揀四單最爆嘅同大家share住先。
撰文：關仁
「魚仔」屎橋立官威
「魚仔」入咗公仔箱之後，權力慾越嚟越大，由於過往頒獎禮啲姐仔哥仔攞獎，只係多謝「假姐」同「數毒」，好少人會多謝魚仔，因為平時同佢冇乜接觸，佢江湖地位又冇假姐同數毒咁高，所以魚仔度咗條屎橋，就係要約見全台藝人見面傾偈，喺班藝人面前擺番個姿態。關仁聽聞佢想做「大帥」之前個總經理位，所以樣樣都要管，又藝人又工程部，其實做咁多嘢，無非為做總經理鋪路囉。
「蚌姐」當正老闆娘
電視台姐仔「蚌姐」恃住同高層嘅關係，當正自己老闆娘，氣燄真係好勁！幕後工作人員爆料，蚌姐當正自己係老闆娘咁，遲到早退已經係慣常事，連監製導演都唔敢哼一聲。話說有次蚌姐對劇本好有意見，要求導演照佢意思改動，其他演員啲對白自然受影響，有位甘草原本有戲變冇戲，等咗成晚又話可以收得工，自然唔多高興，不過佢知人哋把口大，只好吞聲忍氣，真係好慘囉！
「大木偶」帶頭玩扭計
拍咗套《門當戶對》而攞獎嘅「大木偶」，如果你以為佢攞獎而升呢嘅話，咁就大錯特錯，事實上一直以嚟，好多人聽到佢個名都走夾唔唞！呢位阿姐氣燄逼人，聽講佢嗰陣幫《門當》做宣傳，好似有啲場面諗住係幾個主要演員跳舞，但係呢位阿姐唔單止唔肯，仲要叫埋啲拍檔齊齊say no，結果要為佢改曬啲內容，最慘係好多藝人都跟風扭計唔跳，好多幕後都有冤無路訴！
「韻律泳」狂鬧人出氣
做爛仔做到出位嘅「韻律泳」，不時俾人影到佢同啲女仔出雙入對，每次有親呢啲新聞，梗有記者問嚇佢啦。唔知係咪身有屎，抑或唔忿氣次次俾啲女擺上枱，呢位阿哥俾人問親呢件事，塊面已經燶燶哋，不過喺記者面前，佢梗係唔會發脾四跟住活動尾聲，又有人搵工作人員去搵佢出嚟，雖然佢最後都有出嚟答兩句，但係一擰轉背就狂鬧個工作人員出氣，仲走去人哋部門投訴㖭！
|
鍾意就快D Share啦！
|
|
|