面對面
豪情是這樣的 林嘉華
「豪情」兩個字該如何解讀？我總認為正在上畫中的電影和電影男主角屬於錯誤示範。
豪情不是刨鹹書拍 AV、不是口沒遮攔信口開河、不是禍從口出認錯當食生菜，男子漢的豪情該是正義凜然貫徹始終，該是從一而終不犯錯就自然沒有認錯的機會，該是像林嘉華一樣—— 57歲、演戲 36年，個 record從來冇花過，無論花邊新聞幾繽紛、網絡訊息幾發達，都夠膽大大聲講：「做過就點冚都冚唔住，我咁多年形象好，唔係冚得住，唔係包裝得靚，係我從來都冇做過。我都唔出夜街嘅，狗仔隊梗係唔會夜晚喺條街影到我囉！」
說這番話的時候，太太劉寶珍（前無綫服裝部主管）就坐在身邊，一邊聽一邊點頭附和，今年 11月 11日，是兩個人的三十周年結婚紀念，八零年末移民加拿大，九零年末兩邊走過戲癮，華哥上個星期專程帶著太太回港為新戲《魔警》宣傳，這一次，又是演他最擅長的角色——警察。
16歲考少年警察訓練學校，志願原本是做警司， 20歲拍電視、 22歲就認識太太，拍拖結婚一晃三十年，林嘉華說得好，拍戲做過警司、又溝過港姐，演戲甚麼都能試、要多放肆都可以，做人還是平淡安穩的好。
警察故事
電視劇《學警狙擊》和《飛虎》，電影《竊聽風雲》、《男兒本色》還有林超賢最新作品《魔警》，林嘉華這些年來總演警察，而且職位愈來愈高。話說華哥的父親是警察，林嘉華 16歲亦考進少年警察訓練學校，並且從學堂第一名拿「銀雞頭」畢業。考警察的最高志願本來是想做警司，卻因為生得英偉正氣被警察公共關係科揀去做《少年警訊》主持人，再被當年麗的麥當雄挖走拍電視，這才發現，拍戲一樣可以過警惡懲奸的癮，收入還比警司高。
三十多年過去，再回流香港走到街頭，華哥也說，如今街上看到的警察威嚴不如當年：「時代唔同，以前當差重武，𠵱家重文。以前啲人通山走，人都黑黑實實啲，𠵱家啲人下下都係對住電腦、坐喺屋企，皮膚白雪雪，仲要近視添！仲要套制服變埋呢……唔多唔少都有影響。望落係冇咁賞心悅目！」
真實世界男子氣概買少見少，陽剛味只好在電影裏面找：「林超賢電影啲戲我睇好多，我鍾意佢拍戲有質感、陽氣重。𠵱家啲戲唔同以前，以前係忠就忠、奸就奸，冇灰色地帶，年代唔同連拍戲都變得愈嚟愈寫實，咩係正？咩係邪？歌仔有得唱：難定分界。所以話老祖先真係有智慧，你睇嚇個太極八卦圖案，一半白一半黑，黑裏帶一點白、白裏又帶一點黑，正邪其實係互相調和互相成就。拍戲我唔怕做奸角， 87年監製搵我做《新紮師兄》，兜一大個圈話個角色亦正亦邪驚我唔肯做，做奸角我係驚你唔夠奸啫，點會做咗奸角就會花 record？成日接警察戲我唔怕，最怕有一日紮到我升上警務處長啫。邊有戲係成套講警務處長？咁咪即係唔畀戲我做！」
電視風雲
78年，林嘉華從警隊跳到電視圈，加入麗的拍《鱷魚淚》。沒有經驗、沒有背景，他說靠自己爭氣，兩年就做了當家小生，被無綫高薪挖角。 80年過檔時，激怒了當年發掘他的麥當雄，下令即時抽起日日在播的「麗的寵兒林嘉華」宣傳片，又發通告到各大傳媒宣布永不錄用。
「無綫簽我，預咗合約一開始履行就開劇，但係劇都唔係話開就開㗎，都要度衫訂裝。藝員部主管驚我俾人告，發通告、搵人全部保持神秘唔講邊個，搵我訂裝都係揀星期六公眾假期，仲要係五點後駐台記者收曬工，線人睇到冇人喺度至用專車偷偷運我入去。」
斷斷續續效力無綫三十年，直到兩年前倒戈幫王維基，兩個字：「誠意」。「佢打畀我話想學做電視，仲話面談，跟住就飛嚟多倫多親自見我。飛機坐咗十三個鐘、見面再傾十幾個鐘，傾完又再上機走。呢個人有方向感使命感，想令觀眾有選擇，當時我未應承佢，淨係當朋友，我覺得呢個朋友識得過。」
後來港視真的開台、林嘉華亦真的簽了部頭約，一口氣拍了《驚異世紀》、《警界線》和《開腦儆探》三套劇，本來還有收了劇本的《 Night Shift》，可惜免費電視牌照申請失敗、流動電視又被阻撓，拍好的無緣播出、未拍的胎死腹中。
「劇拍完，同香港電視嘅合約就已經完咗，想拍戲我仲有其他電影傾、無綫我又冇話過唔會返，可惜嘅唔係我自己，而係香港嘅電視前途。香港嘅電視曾經因為創新大膽，喺成個亞洲領先。今時今日，觀眾選擇愈嚟愈高、要求愈嚟愈高，唔係冇人拍好嘢，而係政府唔畀你拍又畀唔到一個令人滿意嘅原因。我擔心嘅係少咗一個媒體，就扼殺咗一個溫床，香港電視就會因此少咗一班人材、少咗一個鍛煉同發揮所長嘅機會。時代喺度倒退。」
愛情萬歲
上文說到跳槽去無綫，藝員部挑了一個避開耳目的公眾假期，落下神秘 order要化妝和服裝部頭目親自銷假留守服侍，當年的化妝部總監是陳文輝，服裝部頭頭則正是林嘉華的現任太太––劉寶珍。那個週末，就是兩人第一次見面。
「第一次見，未過電。太太仲話嗰日好憎我，通告懶神秘咁唔肯講係邊個，人哋本來約咗屋企人 BBQ喎！我哋成日一齊做嘢，第一次刮目相看，已經係幾個月後，坐一架公司車去中大做嘢，落車一齊行緊，佢無嗱嗱同我講：『我屋企有條偏方，用水蟹煲海參，清熱對皮膚好啲，你想唔想試嚇？』嗰陣時，我幫無綫拍劇爆曬瘡，皮膚係差。但我話曬係小生，嗰個年代唔多唔少都有啲距離，你咁講嘢，唔怕俾人鬧咩？關你咩事啫？好肉酸咩？佢就係唔怕，就係好心想幫我……」
拍拖四年後兩人結婚，今年 11月 11日就是三十周年結婚紀念，華哥說三十年如一日，年年都會丟下兒子二人世界特別慶祝，歷久常新不言悶的感覺來自把她當女朋友而不是太太，說到這，沉默了好久的華嫂開口附和：「佢真係咁樣做，當我係女朋友，去到邊會記得買我鍾意嘅嘢，我講過嘅嘢、佢成日記住，屋企花園種嘅花全部係我鍾意品種，成日瞓醒覺，會見到佢喺花園摘番嚟一紮花擺喺床頭……咪就係呢啲囉。」
咪就係呢啲嘢囉，在場男女聽了都嘖嘖稱羨，華哥聽了簡簡單單作總結：「兩個人，好簡單，你想日久生厭定想日久生情咋嘛。形象唔使專登保持，你係咩人扮都扮唔嚟。維繫婚姻都係一樣，你對佢有心，就自然會做，你唔係嗰啲人，就自然唔惹緋聞。」
發電機的故事
林嘉華說自己做人做戲的經驗都豐富，惟獨沒有危機處理的經驗，因為三十多年來從來沒惹過事上過頭條。想了好久，他說要說故事，是與太太三十年來鮮為人知的「危機」。
「 91年我返香港拍劇，太太留喺加拿大。當年拍戲制度唔同𠵱家，道具車係男主角揸返廠，女主角都係坐我車返廠。經過深灣遊艇會大塞車，我諗到入遊艇會調個頭行第二條路去避塞車……嗰晚，我如常打畀太太，佢閒話家常，我就講嚇拍戲啲嘢，濕濕碎碎講埋塞車調頭單嘢。太太話佢知喎……原來嗰日晏晝已經有線眼報料，話見到我同某某某喺遊艇會走出嚟喎。」
女主角是誰？華哥留到最後開估：李美鳳。緋聞女主角是九十年代名震江湖發電機，太太都沒半點懷疑，華哥這一刻的模樣，得戚到呢！
|
鍾意就快D Share啦！
|
|
|