第二晚的演唱會，阿澤知衰辭演，祖兒則在事後接受訪問，被問及會否接否阿澤道歉，態度繼續強硬：「觀察一陣先，因為唔止我一個受害者，我自問唔係一個衝動嘅人。」
封面
堅嬲真相 踩標尾會•笑腳趾似鳳爪 臭口澤唱祖兒：「揀件垃圾！」
週日（ 30日），容祖兒突然在各大社交網絡發火，指名道姓話杜汶澤是娛樂圈唯一一個討厭的人。出道十五年、出曬名面面俱圓易話為，因乜解究連容祖兒都會鬧人？
咪以為天後小氣，講句笑話都認真嬲！冰封三尺非一日之寒，據悉杜汶澤近年事業回勇後就故態復萌，口沒遮攔得罪英皇上下，祖兒一早睇唔過眼，兩年前仲被恥笑票房毒藥、又話腳趾似鳳爪，再踩埋男友劉浩龍係「垃圾」，才是真正挑戰祖兒條底線，難怪今次佛都有火！
惹事原話：「今晚我揀咗容祖兒首歌唱，早兩年問佢老細楊生，氹佢攞錢拍《 Diva》，我同佢講部戲一定捧祖兒做影後，結果佢做唔到影後，但我攞咗影帝，佢啱啱喺後台先發覺我搵咗佢笨，所以我送呢首歌畀佢，希望佢永遠唔會遇到我呢類衰人！」
一連兩場《伍樂城幻想國度作品展》上週六（ 29日）在紅館舉行，群星拱照的畀面派對，第二日卻搞到滿城風雨。嘉賓之一的容祖兒突然節錄報紙新聞，附上百多字感言，指名道姓批評同晚另一位嘉賓杜汶澤。內容雖然是前一晚杜汶澤在舞台上有關《 DIVA》的一番爆肚言論，據悉，實際激怒祖兒的唔止咁簡單。
屈祖兒恨做影後
據知，演唱會當晚共有四個化妝室提供給歌手，英皇眾星有最大的一間，不過容祖兒和杜汶澤在後台準備時，已經刻意避開對方；而祖兒的助手，亦預先打聽對方上台對白，結果杜汶澤的上台對白，與原先大有出入。
知情人士說︰「阿澤上台前話唔會提祖兒，只係講嚇同伍樂城學生時代趣事就算，點知上到台完全唔係嗰回事，祖兒喺後台聽到即刻火都起，仲推跌後台個花籃。佢仲夠膽提《 DIVA》？祖兒唔鍾意佢，就係由《 DIVA》開始，拍戲懶係熟咁影 Joey嘅腳趾，仲周圍傳畀人睇，笑人腳趾生得似鳳爪。又周圍話祖兒恨做影後所以開《 DIVA》，其實好多人都知《前度》同《 DIVA》係阿澤低潮時（拍《低俗》前）求 Mani開畀佢，女主角阿嬌同祖兒都係幫 Mani捱義氣。阿澤𠵱家調轉嚟講，仲笑祖兒想做影後，點會唔嬲？」
《低俗》前後兩個樣
「尊稱」杜汶澤做「民主英雄」，其實祖兒此舉不止為自己吐一口怨氣，亦得到英皇上下支持。
踩自己尚且可以畀面經理人 Mani一笑置之，去年初祖兒與劉浩龍公布戀情，阿澤又諸多見解，真正點正祖兒死穴。的確，祖兒和師兄相戀，當初亦不被眾人睇好，但師兄實在對祖兒細心又照顧，連容媽媽亦十分接受這個「未來女婿」，可見師兄真正入屋。
「阿澤周圍同人講劉浩龍係垃圾，祖兒係因為趕住標尾會，至連呢件垃圾都肯要，傳傳嚇就傳去祖兒度。其實祖兒演唱會嗰晚已經想打定篇文發火，不過等到第二日中午至 post上網，係因為要畀其他人過目囉！」
知情者說，自從 12年的《低俗喜劇》大收，去年個人棟篤笑《哢啦騷》又場場爆滿，杜汶澤意氣風發，自恃得寵去到邊都提住老闆楊受成，又完全唔畀面經理人 Mani，曾經在飯局中當住眾人面講笑話︰「佢做我經理人？我教番佢做嘢至真！」
田蕊妮︰你問番佢
學祖兒話齋「江山易改、本性難移」，杜汶澤多年來得罪人多稱呼人少的事跡確實多籮籮。當年從亞視小藝員成功泊得林建嶽的大碼頭，因《無間道》傻強一角彈起，再同劉華、秋生、黎明做好兄弟，結果卻因為一朝得志語無倫次得罪大半個娛樂圈。
原來 07年最低潮時期，有人哭哭啼啼、洗心革面求收留，想不到事業一見起色老毛病又發作，知情人士說︰「 07年杜汶澤好似過街老鼠一樣，成個娛樂圈冇人敢搵佢。係自己打畀 Mani求人畀機會佢，大家出去唱 K佢就坐埋一邊喊，流曬眼淚話唔知點算，唔知點樣面對老婆，又食齋又戒煙，連把口都收埋，乜是非都唔肯講，當初真係信佢變咗另外一個人㗎！」不過始終三歲定八十，觸怒英皇一姐，杜汶澤今次有排煩。雖然極速 po了「道歉啟事」認矮仔，杜汶澤週日亦「龜縮」甩底伍樂城尾場騷，避與祖兒同場。
本週一，本刊致電田蕊妮，問她阿澤又惹麻煩，她說︰「唔回應喇，唔回應喇，你問番佢」上次阿澤同黃秋生罵戰，阿田都開口撐，今次似乎撐唔住喎。
口出狂言
02年杜汶澤憑《無間道》衝出亞洲（電視）變影圈紅人，一度打進影帝影後朋友圈威風八面，不過一套《伊莎貝拉》揚威即時得罪全世界，一朝得志早有前科。
鬧契弟
本來成功埋嶽少、劉華堆，更獲華仔以「朋友價」 13,000借住加多利山豪宅， 05年嶽少、華仔拒絕出資開拍《伊莎貝拉 2》，暗地鬧兩位老闆「正契弟」，即被嶽少掃出東亞、再被華仔趕離加多利山。
咒生仔
杜汶澤由亞視奀星得以入商台、拍電影，都係多得貴人吳君如帶挈，不過阿澤卻在商台得罪俞琤、再鬧恩人吳君如「生仔冇屎忽」，多年後二人雖然和好，君如仍然承認杜汶澤曾經被勝利沖昏頭腦。
打網戰
05年與田蕊妮大婚時，黃秋生是新郎杜汶澤兄弟團，秋生最近卻因為杜汶澤評 CY女一事公開批評昔日兄弟：「你話人冷血，你又有幾熱血？佢喺圈中有幾多朋友？有幾多人曾經包容佢，後來唔再包容佢？」
唱埋霆鋒
踩低一姐容祖兒，原來杜汶澤連一哥謝霆鋒都得罪埋。今年初，浙江衞視為霆鋒度身訂做真人廚藝騷《十二道鋒味》，每集走訪一個國家、炮製一道私房美食、親自邀約一位巨星好友。據悉霆鋒本來有意邀請吳君如做嘉賓，又被杜汶澤從中離間：「佢（謝）收浙江衞視咁多錢，但係畀嘉賓就得封利是仔，唔好去」結果成功動搖君如、亦輾轉傳到霆鋒耳中。不過咁，背後踩完，週日杜汶澤在 facebook公開讚霆鋒，呢啲咪講一套做一套囉。
|
鍾意就快D Share啦！
|
|
|