行行嚇唔小心甩鞋，千語 BB即刻驚青眨眼。好彩條裙夠長，遮曬甩鞋嘅後腳，千語 BB先冇咁尷尬。
FBI
甩鞋千語 論盡紅地氈
吳千語自從榮升林峯嫂後，被邀出席名牌同社交活動多到數唔曬，恨死唔少女星。
話曬都算係電影界嘅一分子，上週四（ 27日）千語 BB就被邀出席喺澳門舉行嘅「亞洲電影大獎」頒獎典禮。當晚都有唔少巨星出席，好似劉嘉玲、章子怡、吳君如同甄子丹等等，個個分量十足，行紅地氈時更係大方得體，可惜千語 BB唔知係咪未行慣紅地氈，定係揀錯裙，當晚佢行行嚇竟然唔小心甩鞋。除咗甩鞋，千語亦好論盡咁全程用雙手拉起條公主裙，即使地氈旁有 fans叫佢名，佢都無手同對方 say hi。之後佢同 FBI講：「有問過大會可否安排男伴扶，但大會話冇……男友（林峯）因為要做嘢嚟唔到。」
講真個個女星行紅地氈，條裙都係有咁長得咁長，嘉玲、子怡，就連 Da Da都未驚過，千語 BB咁後生仲有大把紅地氈要行，得閒要喺屋企練嚇喇。
章子怡憑《一代宗師》奪影後，今次已經係佢第 8次做影後，大家睇佢行紅地氈個自然自信樣款，咪知咩叫影後級囉！
|
鍾意就快D Share啦！
|
|
|