掃呢頁CODE去手機

2014年4月16日 星期三

[FACE 360] 怪獸家長 想生唔敢追 陳茵媺谷叻 B報英基 茵媺,陳茵媺,MF,




產後復出的陳茵媺極速開工,最近仲幫美容產品拍了一輯廣告,身形仍然 fit爆。

真面目

怪獸家長 想生唔敢追 陳茵媺谷叻 B報英基

成功拑實筍盤陳豪、四個月大寶貝仔 Aiden又肥肥白白,仲要生完一樣得無綫重用,六月黃秋生重頭劇女一寶座走唔甩,做女人做到陳茵媺咁你話幾好?

一心諗住有仔趁嫩生, 33歲陳茵媺追多胎計劃,卻因為開劇日期一推再推要擱置。大台出名好「大方」,去年已經因為意外懷孕搞到缺席宣傳兼辭演新劇,又難怪 Aimee唔敢再博多鋪,惟有全力谷 Aiden做超 B,報定名牌國際學校實際啲!

陳豪和陳茵媺去年 12月誕下結晶梓燁( Aiden),最近一家三口去旅行慶祝乖仔百日生辰好溫馨。

網上圖片

囝囝 Aiden(陳梓燁)都未滿四個月大,陳茵媺已經放曬聲氣,話隨時 ready生第二個。想趁後生追多個係真,不過不設防實幹就要等嚇,話說無綫一早吹風、搵秋生回巢夥拍黎耀祥的重頭民初劇,全台花旦都吼實嘅女一號,一早預咗 Aimee。

培育全能尖子

本來想計定時間做人播種,但影帝視帝個期都難就,四月推五月、五月推六月、𠵱家又隨時七月至開到工,搞到陳氏伉儷追多個計劃大亂。

細 B唔敢追,據知情人士透露,雖然 B仔 Aiden未夠四個月, Aimee已經快人一步鋪定後路搵定學校。「陳豪喺澳洲留學、 Aimee就喺加拿大長大,所以兩公婆一早打算送 Aiden讀國際學校。最搶手嘅英基同耀中, Aimee都有去聽講座,暫時佢都係諗住以馬鞍山英基幼稚園做目標,又睇定好多 playgroup,總之要阿仔七項全能」

陳豪賣 M記咖啡出曬名,帶挈埋老婆幫手宣傳 M記早餐,兩公婆齊變生招牌。

黃秋生將為 TVB開拍的《功夫》,據知屬意由陳茵媺做女主角,但因秋生要求齊曬劇本先開工,令該劇由原定 5月開拍推遲到 7月。

陳茵媺懷孕時被迫辭演《寒山潛龍》,改由林夏薇替上,難怪陳茵媺怕再推劇會被 TVB詐型。

中價名牌

相對港島、九龍塘區撰擇大把,家住大埔比華利山別墅嘅 Aimee想送 Aiden讀國際學校,選擇其實不算多,位於馬鞍山烏溪沙的英基幼稚園,每年學費超過 6萬大元,比起其他天價國際學校已經叫實惠,加上校舍 09年才啟用,環境新淨,難怪鄰居張繼聰、謝安琪的 7歲愛兒張瞻,亦由幼稚園一條龍讀到小學 Grade 2。



鍾意就快D Share啦!