2014年5月13日星期二

【收視出爐】重播《我和殭屍》撼膠馬騮首集收視：1點

2014-05-13 22:11:00

當年《殭屍》結局篇收視有10點（約60萬人次收看）

亞視喺上個禮拜聲稱徇眾要求，於8點半呢段黃金時間重播陳年舊劇《我和殭屍有個約會》，擺明力撼宇宙膠劇的《西遊記》，佢哋仲播咗個打馬騮記者會，實行一抽再抽，幾有氣勢呀！

雖然呢套《殭屍》已經一loop再loop咗N次，係宇宙翻播率最高嘅節目……之一。不過亞視執董葉家寶就話：「好嘢不怕百回看，播多幾次又何妨」，終於，亞洲亞洲嘅皇牌之最《殭屍》，喺噚晚播出第一集，點知收視只係得1點（6萬4千人），係1點呀！

雖然亞洲亞洲啲節目收視不嬲都徘徊喺單位數，平時收視最高嘅多數係新聞，之不過亞視係咁幫陳年《殭屍》造勢，又霸氣地打馬騮，仲搵埋劉錫賢集集拍條片「導讀」，似足對台《膠遊記》咁。但到頭來都係得1點..嗰陣燶味真係隔住mon都聞到.....上次《殭屍》首播，大結局一集，都有10點收視。以當時比率嚟計，都有成60萬人次0架……。

至於宇宙膠劇《西遊記》繼續低收，平均有23點（149萬人）。而無綫高層鄭善強今日喺將軍澳出席傑出員工頒獎禮時，講到《西遊記》收視麻麻，就死撐劇集收視有上升空間喎。

對於呢個結果，網民就概嘆：「屎味嘅咖喱同咖喱味嘅屎，點揀啫！」，唉！