[壹週刊 1263] 何柱國千萬娶新抱 M1,

社交圈

何柱國千萬娶新抱

星島集團老闆何柱國及旅發局主席林建嶽做親家，他們的仔女、何正德同林恬兒的婚禮非同小可，先在法國康城搞婚宴，週日又在君悅酒店補辦喜酒，咁富豪婚禮又花幾多錢埋單？一向沙塵的新老爺何柱國話︰「佢哋（新人）邊有？……即係……點樣俾呀？係我娶新抱，無理由係我個仔同新抱俾，咁又唔使五千萬，但呢個數我唔睇。」何生咁豪氣，難怪有傳新外父嶽少，一個仙都唔使俾，就賺咗半邊仔。

而初歸新抱林恬兒更知情識趣，猛笠老爺、奶奶高帽：「我好好彩，未嫁前佢哋已當我係女，開始都有教導我，老人家講真係要聽；佢哋送我咁好嘅婚禮，我真係好滿意，同埋送咗個咁好嘅老公俾我。」

婚紗是過百萬的 Dior Haute Coulture，加埋男家送的首飾，絕對分量十足。

記者叫新人嘴嘴，估不到又有求必認，更連嘴三次。

新奶奶何黃敏珊（右二）入席前一直唔見傳媒，直至上台祝酒才現身。

外母謝玲玲戴的首飾不比愛女遜色，這晚她由心兒和孝能陪伴左右；大女出嫁，她笑住話：「初時，女婿問我 permission求婚，我唔捨得（個女）而喊，但我而家好開心欣慰，個女搵到個咁明白同愛錫佢嘅老公。」

跟嶽少三女愛兒（圓圖）過從甚密的賭王四太女超盈，跟阿媽分開入場。

謝玲玲的父親是國民黨將軍，故國民黨榮譽主席連戰亦送上花籃。

香港婚禮是用酒會形式，但延續法國婚禮的主題，同樣飾以牡丹及玫瑰。

官商撐場

兩個大粒佬請來的嘉賓當然非富則貴，達官貴人一個接一個，當中新老爺何柱國曾擺明唔妥的梁振英亦係座上客；而被澳門政府咬住唔放嘅大劉，跟兩屆澳門特首就同場現身，魔鬼盡在細節中。

李嘉誠和大仔李澤鉅俾面到賀，新外父林建嶽（左一）和新老爺何柱國（右二）又豈敢怠慢？

就算大劉被澳門政府裁定洗黑錢罪成，但他仍有心情拖甘比和一對仔女出席婚禮。

甘比拎住兩個鱷魚皮 Hermes clutch，佢阿媽就做阿四湊住兩個孫入場。

澳門現任特首崔世安（右一）和前澳門特首何厚鏵（圓圖），均獲兩位主人家熱情招呼。

香港三屆特首：董建華（圓圖）、曾蔭權（右圖）和現任的梁振英，難得同場出現私人活動。

鍾意就快D Share啦！

下一篇 》