【恭喜曬！】被朋友追問結婚未？ 「許師奶」鄭秀文：結咗啦﹗
2014-05-13 23:00:00
鄭秀文話已有結婚時間表，但就唔會公開，同埋佢同安仔冇諗過要小朋友。（攝影：陳志嵐）
「許太」鄭秀文（Sammi）今晚以一身花喱碌型格look，出席JIMMY CHOO揭幕派對，遠睇以為佢穿see through出席，Sammi就話：「唔係（see through），密實0架。」係咪結婚唔畀性感？Sammi表示：「我不嬲唔行性感，工作上需要冇所謂，以前演唱會造型仲離譜，一條羽毛遮曬，可能人哋要大條啲。」
許太駕到，當然要追問結婚事宜，講到劉浩龍（師兄）早前爆響口話Sammi及許志安結婚，安仔事後指師兄亂講，又笑言同對方唔係好熟，Sammi被問到此事時，就話：「我諗佢戥我哋高興，其實今年我有派利是，因為自己決定咁做（指結婚），所以對我自己嚟講都係一樣，以前派利係工作需要，今年意義唔同，好多相熟朋友問我結婚未？我唔想煩，就話；『結咗啦﹗』，點樣稱呼我都得，因為呢件都係遲早的事。」
咁究竟幾時同安仔結婚？Sammi表示：「我心態上其實冇分別，因為0依家日常起居飲食，都已經一齊，已經超越咗幾時註冊行禮，0依家反而重要嘅係對方身體，決定一齊之後，對方健康係好重要，以前拍拖，可能會諗去邊度旅行好玩，0依家著重對方健康，以前冇食早午餐，0依家都會食。」
記者再三追問計劃幾時結婚？Sammi就話：「今次講最後一次，我哋有自己時間表，但係我哋時間表唔會公開，我哋兩個人有共識，加上我哋冇諗過要小朋友，所以我哋時間表係Open。（叫安仔做老公？）我私底下私訊話畀你哋知。」
另外，講到網上有資料顯示Sammi係安仔配偶，Sammi諗咗一諗再話：「係呀，係配偶，大家個心都安定，加上我哋呢個年紀，我唔係0靚妹，佢唔係0靚仔，去到呢個歲數，儀式嘢真係唔急。」
咁安仔有冇嬲師兄？Sammi話：「唔係，佢哋熟到不得了，佢替我哋開心到不得了，佢真係收過我利是嘛。」咁安仔同師兄係咪唔熟？Sammi大笑：「許志安講笑技巧，真係差到不得了，佢講笑呢，人哋聽落似認真，佢哋之間小事到冇事，我自己同師兄好Friend，所以冇問題。」問到可否稱呼佢做做許太，甚至係許師奶，Sammi就話：「得，乜都得。」
鄭秀文唔介意被稱許太或許師奶﹗
Sammi今晚一身花喱碌打扮出席活動，型格十足。
Sammi表示遭相熟朋友追問係咪結咗婚，佢就話唔想煩，所以就答：「結咗啦﹗」
|
鍾意就快D Share啦！
|
|
|