自導自演拍《盂蘭神功》的張家輝，於拍攝鬼上身跳樓梯戲前，來回在欄桿前計算起跳角度，又要醞釀鬼上身情緒，佢話同拍動作片一場，付出好多心機。
真面目
嚇一跳 撞邪疑雲 張家輝鬼上身激跳
近年張家輝狂拍動作片，早前先憑《激戰》攞走「香港電影金像獎」影帝，最近又拍住吳彥祖主演新戲《魔警》玩警匪大戰。 49歲張家輝拍足 25年戲，獎又攞到手軟，上年終於玩過界，處男自導自演新戲《盂蘭神功》。
首次執導新戲，家輝唔玩拳擊改玩嚇鬼。將於 7月上畫的《盂蘭神功》，以鬼節做背景，配合傳統神功戲班，聽落已覺恐怖。最驚嚇一幕，講家輝瞓醒發現自己爛腳，最後翻查閉路電視先知原來自己鬼上身跳樓梯，睇到心寒。拍得鬼片預咗邪，據知家輝在拍攝現場更發生撞邪疑雲，張導演嚇到發惡夢！
從影 25年的張家輝，拍過 60部電影，搞笑、動作戲統統演齊，上年鼓起勇氣執導筒開拍《盂蘭神功》，更兼任男主角自導自演起雙飛。定於 7月 10日鬼節前上畫的《盂蘭神功》，故事發生於農曆 7月，以充滿神秘氣氛的中國傳統戲班為背景，講述於鬼節前夕，一個快將演出神功戲的戲班，團員接二連三撞邪遇上恐怖怪事的經歷。
右腳腐爛
戲中男主角張家輝飾演幫老豆接管戲班做班主；女主角劉心悠則扮演戲班花旦， 2人除有感情線發展外，仲齊齊撞邪。
戲中最驚嚇一幕，要數張家輝一日瞓醒之後，竟然發現自己右腳膝蓋附近無故腫痛腐爛，為找出真相，家輝翻查閉路電視，發現原來自己鬼上身，仲跨欄跳落樓梯，嚇到大嗌救命，影帝驚驚表情超曬班。
據知此場戲更是由家輝親自構思，源自家輝一直覺得閉路電視令人感覺詭秘，加上好多案件都由閉路電視找出真相，所以今次家輝執導的新戲亦大玩「老閉」橋。
「好似考試！」
首拍恐怖片，家輝避唔開遇上離奇事件。話說有次拍火燒場面，眼利的家輝發現其中一個負責控制火場的工作人員，突然目光呆滯，之後更被煙焗到唞唔到氣都唔識離開火場，最後要由家輝指示其他人將他拉開，該工作人員定神後，才知發生什麼事。事後各工作人員也議論紛紛，加上家輝一直重複拍了多場鬼上身戲，更搞到自己發惡夢。
家輝搏老命為處男執導新戲，而飾演戲班花旦的女主角劉心悠，亦有唔少鬼上身演出。首次扮神功戲花旦的心悠，唔只要練造手，演鬼上身時更要拗腰，又要跳來跳去，消耗不少體力，難怪她亦跟工作人員表示，拍鬼片跟動作片一樣咁辛苦，好彩導演家輝不時上前鼓勵才捱得過。
話曬《盂》片係家輝處男執導，佢自覺好似考試咁；「做導演係以前未接觸過，係一個新學習。今次執導好似考試咁，要套戲出街後先知成績，知大家點樣評分，我好期待。不過無論得與失，我都會以平常心對待。」
導演癮
呢兩年有唔少明星想升呢執導筒，去年有楊采妮的《聖誕玫瑰》和任達華拍了《迷離夜》其中單元，今年仲多明星級導演加入，除張家輝外，天王黎明亦將自導自演新戲《酒戰》，片酬同導演費係咪又收多份呀？
|
鍾意就快D Share啦！
|
|
|