[FACE 365] 月索幾萬 10月斬纜 蕭正楠踢爆何傲芝澳門搵老細 蕭正楠,何傲芝,MF,

二人拍拖 3年多，蕭正楠難忍何傲芝大洗兼花心，所以上年 10月斬攬。但 11月《巨輪》結局騷，大台竟然搵何做司儀，難怪蕭正楠面燶燶。

封面

月索幾萬　 10月斬纜　蕭正楠踢爆何傲芝澳門搵老細

蕭正楠和黃翠如最近被爆因拍《師奶 Madam》撻著，「棄婦」何傲芝即在微博寫上：「邪不能勝正」，暗寸黃翠如係「小三」。好在翠如 BB有大台撐腰，即時幫新情侶消毒，蕭正楠更於《東張西望》發表愛的宣言，強調翠如並不是「小三」。

新歡不一定邪惡，舊愛亦不一定清純，據知何傲芝跟蕭正楠拍拖期間，不時當蕭正楠提款機。月入約兩萬的何傲芝，不單要求蕭送車、畀「零用」，仲經常過澳門識有錢猛人。表面受情傷的何傲芝其實一早搵定大水泡。

其他影片：

• >>何媽撐女

一向形象健康的《東張西望》主持何傲芝，最近因前度蕭正楠跟黃翠如拍劇撻著，忍唔住喺微博寫上：「邪不能勝正」。初時的確令翠如 BB變成嫌疑「小三」，但深得大台高層痛錫的翠如冇有怕，大台即時出手幫 BB消毒。何傲芝奸計唔得逞，自身臭屎反被愈揭愈多。

黃翠如被屈小三

「翠蕭戀」曝光，何傲芝即時喺微博還擊，引用舊愛名句「邪不能勝正」。何以為可以搞到翠如 BB形象破產，可惜轉頭搞到兩敗俱傷。

《蘋果日報》圖片

澳門猛人成哥

何傲芝不時主動出擊，早前太陽娛樂搞活動，何傲芝除咗主動跟太陽娛樂高層成哥黐埋玩，仲主動姣老闆周焯華（小圖），可惜華哥唔騷佢。

馬主王嘉恩

何傲芝曾為馬會節目《馬上全接觸》主持，所以同一眾馬圈人仕相熟。其中有傳佢對馬主兼東源大地有限公司總裁王嘉恩相當嗒糖，但已婚的王就表示：「同佢係好朋友。」

網上圖片

唔只馬主，何傲芝對富二代亦唔放過，對著名練馬師告達理兒子 Martin Da Cruz亦繑曬手好熱情。

當男友提款機

何傲芝與蕭正楠拍拖 3年多，由於拍拖初期蕭正楠未彈起，所以男方一直被女方家人睇唔起。直至近年蕭正楠漸上一線，拍劇、登台多，收入水漲船高，何傲芝開始當男友提款機。

本身做《東張》主持的她，連馬會外快，每月其實只有 2至 3萬元收入，但經常買入過萬元的名牌手袋，原來全部係蕭正楠揼水。何即使唔買名牌，亦每月定期伸手問男友拿數萬元零用錢。

蕭正楠上年 10月同何傲芝分手，之後 11月拍攝《師奶 Madam》，二人劇中飾演情侶，估唔到戲假情真，真係撻著。

何傲芝經常叫男友蕭正楠買名牌，上年就被本刊影到二人喺日本旅行，何傲芝要蕭正楠畀錢買手袋。

曾破產，但最後被撤銷破產令的何父何世根（左二）一直想兩個女嫁個有錢人，所以經常帶兩個女出席馬圈活動，識多啲馬主。上年著名練馬師葉楚航喺馬場搞祝捷，何父亦兩女到場。《蘋果日報》圖片

嫌補習天王窮

蕭正楠未被力捧前，何傲芝甚少提及男友，除咗嫌對方窮外，亦唔想阻住佢識有錢人。就算以前同補習天王林溥來拍拖，男方月入 6位數，何小姐都嫌人未夠呢，唔認對方係男友，可見何小姐眼光幾「遠大」。

何傲芝同林溥來拍拖期間，何開始做《東張西望》主持。當時何傲芝炒車，揭發該車登記車主為林溥來，而令戀情曝光，但何否認，只話對方係好朋友。

林溥來為中文大學教育碩士，現為 Edflow Learning Center創辦人。為學生補習英文及通識科，加上又係 model，絕對係筍盤。

「一定玩死佢」

據知何跟蕭拍拖初期，四圍同人講係由陳敏之撮合，查實佢係喺朱凱婷（右圖）婚禮上見到蕭正楠，主動向對方出擊。

蕭正楠近兩年於大台套套劇做男二望一，而且內地登台價 20萬一場，養自己之餘亦可「照顧」女友，但原來有人唔知足，借自己於馬場的人脈，經常黐住一班馬主玩。直至上年 9月，蕭正楠向身邊人透露開始覺得何傲芝唔對路，於是慢慢疏遠， 10月更以想專注事業為由，向何提出分手。

慘被飛起的何傲芝即反轉豬肚，誓言：「一定玩死佢！」不過之後又致電給蕭的舅母及姑媽扮可憐，要求幫口𦧲復合。直到蕭正楠踢爆她去澳門黐老細，女方才知冇機罷手。

專吼馬主猛人

早前有讀者爆料話四眼男（後排左一）係何傲芝新歡，不過王嘉恩（前排左一）話：「佢只係我好朋友，佢冇同我講過佢鍾意何傲芝（前排中），我哋有時會搞聚會，亦有 Gigi份。」

網上圖片

其實早在 08年，何於馬會任馬評人期間，社交界便傳過她對從事物流生意，亦係馬主的王嘉恩（ Albert）相當主動，本刊亦於 facebook發現 2人有大量合照。據知，由於王已婚，所以 2人並冇進一步交往。提起何傲芝， Albert向本刊承認跟她相識多年：「呢個圈經常會有好多傳聞。我識 Gigi（何傲芝）好耐，係老朋友，佢係一個好聰明嘅女仔，佢仲教我好多賽馬知識。佢冇向我提過（和蕭）分手，但我知佢因為分手好唔開心。」

知情人更透露，何傲芝為想嫁個有錢人，唔只冧馬主，早前太陽娛樂於澳門搞活動，何傲芝亦主動出擊，知情者說：「佢嗰晚主動行去華哥（太陽娛樂老闆周焯華）度，狂讚對方勁，不過華哥冇睬佢。」老細冇理，但據知何傲芝和太陽娛樂另一猛料高層成哥就好熟絡。

「我哋屋企有家教」

今次「翠蕭戀」，何傲芝因一時之氣，除了輸人，亦被揭臭史， 3月已完約的她現在自由身，而她亦有私幫生意做後備，於銅鑼灣商場賣時裝及「大眼仔」隱形眼鏡，店鋪平時由何媽媽打理。

對於女兒因為跟蕭正楠分手而引起的是非，何媽力撐愛女，「希望大家體諒，我哋只係普通人，我哋唔係想做乜嘢……小朋友我成日教佢哋要尊重。我哋屋企有家教，大家工作一定要互相尊重。所以呢件事，我哋覺得小朋友開心就得。」

據知，這時裝店亦是何傲芝冧掂前男友打本，何媽媽聽到後好肯定答：「百分之百唔係！」

何媽撐愛女

何傲芝媽媽對愛女同蕭正楠分手一事，表現無奈，她說：「小朋友嘅事佢哋開心就得」

睇女新聞

何媽媽每日由將軍澳日出康城屋企出發到銅鑼灣地帶開工，日日搭港鐵返工。上週五（ 16日）收鋪後，何媽媽乘港鐵返家，期間用手機睇何傲芝嘅新聞，真係愛女心切。

翠如 BB後台硬

翠如後台夠硬淨，大台即刻叫男主角喺《東張》現身力撐新女友，仲喺微博留言：「有事請找我！」即時令翠如 BB變回純女。

難得兩個上緊位嘅哥仔姐仔真係拍拖。大台亦識做，將《師奶 Madam》呢套劇提前到下月播，真係點夠大台識計數。

翠蕭戀曝光，蕭正楠即上《東張》解話，承認追求中。

鍾意就快D Share啦！

下一篇 》