探熱針
信風水 黃日華搬屋幫老婆改運
梁潔華去年證實患上急性骨髓性白血病（急性血癌）後，因為一直未搵到適合骨髓移植，要靠化療控制病情，但過去半年來奔波醫院的黃日華及女兒黃芷晴，人前保持樂觀，絕不放棄。
據了解，鑑於梁潔華篤信風水命理，屬鼠的她今年沖太歲，加上租住多年的獨立屋開始漏水，為讓另一半安心養病，黃日華早前四出搵屋，最終睇中價值一千八百萬的比華利山單幢屋，九月搬，齊齊轉運。
舊屋漏水
黃日華一直租住每月租金超過五萬元的大埔雍怡雅苑三千呎的獨立屋，由於環境清幽，加上有曾志偉、苗僑偉兩公婆等好友住隔籬左右，黃日華一家一住多年，甚至曾向業主求售，可惜對方不願割愛而未有成事。
梁潔華去年十二月證實患血癌入院接受治療，出院期間，黃日華安排老婆入住沙田凱悅酒店免受騷擾，已近半年沒有返家的她經高人指點，指五十四歲屬鼠的梁潔華今年因為沖太歲，建議搬屋轉運。
「華嫂好信風水，好多時會搵風水師傅問意見。佢屬鼠今年沖太歲，芷晴屬馬又係本命年，師傅認為兩母女都要轉運，加上屋企漏水，對健康有影響。為咗等華嫂安心，幾個月前華哥四圍搵屋，佢哋住慣新界區，睇嘅都係新界屋苑；最後揀咗比華利山，嗰度私隱度高，保安夠嚴密。」知情者說。
搬比華利山
據了解，黃日華睇中的比華利山獨立屋約三千呎，市值約一千八百萬，梁潔華發病以來，醫藥費已使超過二百萬，但多年來在內地巿場密搵的黃日華，絕對有能力負擔。
「華哥唔聲唔聲，喺內地有好多 job做，華嫂有病，佢陪老婆先至做少咗。今個月，華嫂已經做埋最後一次化療，醫生決定暫時唔再用其他新藥，只有希望搵到適合骨髓。三嫂（戚美珍）搵過蘭子（陳淑蘭）契爺，佢係個高人，幫好多圈中人醫過病，不過最後華嫂都冇去搵對方。」知情者說。
冇曬癌細胞
上週六（六月二十八日）中午，黃芷晴現身首飾品牌活動，對於母親病況，全面唱好。
「已經無事出咗院，醫生話佢差唔多康復曬，之後再做幾次檢查就 OK。佢而家好開心，噚日去咗 apm（商場）行街，我做完嘢返屋企，佢就 show曬啲戰利品俾我睇。媽咪買咗名牌袋俾自己，買咗褸俾爹哋，仲有買咗嘢俾我食。」
一家人決定搬新屋，黃芷晴亦無否認。
「而家籌備緊，因為住緊間屋太舊。（係咪關乎風水？）媽咪屬鼠，我屬馬，有個親戚識風水，話今年都係一個轉變年，叫我哋試嚇搬新環境。」
強調梁潔華已經冇癌細胞好番曬的黃芷晴，表示經歷過今次事件，自己變得成熟，懂得孝順。
「媽咪有病之後變得好小朋友，佢以前比較緊張，性格有啲火爆，而家就倒轉頭，由我 take care佢。爹哋近排有好多 job，成日飛來飛去，我都會買啲禮物送俾爹哋，氹嚇佢開心。」
明星盤
位於大埔三門仔路的比華利山別墅，是明星名人聚居地，屋苑不少單位享有吐露港、船灣淡水湖或八仙嶺景觀，最重要是保安嚴密，圈中人至愛。
陳豪陳茵媺
因為陳茵媺突然有喜，陳豪立即拍板，以 3,360萬購入屋苑第一期 2,400多呎別墅，讓妻兒有個安樂窩，地方大，再生多幾個都冇問題。
|
鍾意就快D Share啦！
|
|
|