探熱針
搵齊腳 《衝上雲霄》終極版 鄭秀文變何年希嫁 Sam哥 佘詩曼踢走徐子珊搭 Cool魔
無綫去年宣布開拍《衝上雲霄》電影版後，除了原有班底 Sam哥及 Cool魔肯定會留低，古天樂加入做飛機師外，女主角人選一直未有定案；電影七月中開機，據了解，何年希已落實由鄭秀文飾演，至於 Cool魔的另一半，有份投資電影的無綫本來意屬徐子珊，但臨門一腳，卻被已回巢的佘詩曼頂走。突然被飛，徐子珊近日頻頻請假，發洩不滿。
重新洗牌
上週二（六月二十四日），跟一班朋友遠飛米蘭過三十五歲生日的徐子珊，校啱時間，是日晨早六點才返到香港，返貝沙灣屋企放低行李，幾粒鐘後再出外做宣傳活動，玩到最後一分一秒。
「早排徐子珊突然收到通知，話唔使佢拍《衝上雲霄》，後來仲知道個角色換咗阿佘做，到手嘅嘢俾人截咗，佢梗係好唔開心，所以近排成日請假，就算《點金勝手》出緊街，佢都懶懶閒，唔係好俾力。」知情者說。
據了解，徐子珊之所以被踢走，跟佘詩曼去年回巢娘家後，樂易玲曾答應對方，公司投資開戲，必定預她做女一有關。
「舊年無綫走咗好多人，冇曬一線花旦咁滯，樂大媽搵阿佘返去，拍曬心口應承幫佢喺電影圈發圍，所以大媽今次好堅持，要監製梁家樹幫手，點都擺阿佘入《衝上》，阿佘為咗呢部戲，本來應承咗同黃秋生合作電視劇《梟雄》，後來都推咗唔拍，無綫唯有搵胡杏兒頂阿佘，至於杏兒本來要同錢小豪拍嘅《武當》，就搵咗楊怡補位，從新執牌。」
無綫諗縮數
據了解，會在戲中飾演 Cool魔前度女友的佘詩曼，因為要同飾演正印的內地女星楊子珊（電影《致我們終將逝去的青春》女主角）瓜分張智霖，佔戲唔算多。
Cool魔另一半變陣， Sam哥亦有新拍檔。一直有指拍劇期間，經常跟兩個男主角有爭拗，好有自己一套的陳法拉果然冇得留低，由人妻 Sammi配不曾合作過的吳鎮宇做夫婦，新加入的古天樂則跟台灣郭采潔做一對，玩異地情。
「套戲預咗要飛去唔同地方拍外景，本來話叫齊成班演員飛去第二度做開鏡拜神儀式，但無綫突然改變主意，話想喺番邵氏搞，但到而家都未有正式時間表。」知情者說。
鬥餐飽
娛樂圈女星除了鬥靚，鬥戲份、鬥身價、鬥待遇，總之乜都鬥一餐，有你冇我！徐子珊鬥佘詩曼，勝負分明。
陳法拉 陳敏之
在劇集《東西宮略》中，夏迎春陳敏之與鍾無艷陳法拉除了在鏡頭前鬥個你死我活，私下亦面和心不和，有指陳敏之不滿對方戲份比自己多而向監製投訴，而陳法拉亦反指她拍《東》劇期間，經常度期接搵錢 job，搞到甩場。
|
鍾意就快D Share啦！
|
|
|