探熱針
張玉珊出招 阿銀莊思明撞樣
在《沒女》誓師大會上，歇斯底里流住兩行鼻涕咆哮：「我有一個夢想，就係唔再俾人歧視！」令廣東話未講得正的新移民阿銀（黃杏銀），比沒女極品 Meggie更早跑出，甚至得張玉珊睇中，搵阿銀改頭換面拍廣告。
有高人背後發功，蛻變後的阿銀，居然同富貴港姐莊思明撞樣，她更衝出深水埗，殺落中環做貴婦，連阿銀自己都忍唔住話：「我係咪發緊夢？」
視像學英文
靠自己雙手打拼，由新移民鄉姑變成兩間布行老闆娘的阿銀，將事業由不可能變成可能，曾為欣宜打造瘦身神話的張玉珊，同樣睇中阿銀的鬥心，出五位數字酬勞請她拍廣告，更免費幫阿銀改頭換面，形象大翻新。
食住《沒女》 timing，張玉珊在兩星期之內，將油頭爛面不修邊幅的深水埗阿銀，越級改造成中環貴婦。由「硬件裝置」做起，一星期減四磅、 botox隆鼻打尖塊面之類，對張玉珊全冇難度，反而要阿銀著四吋高踭鞋行貓步，跟廣告對手貝安琪講英文，才考起最美麗 CEO。
搵救兵！張玉珊安排專業 model教阿銀儀態及 catwalk，再搵教過成龍同李冰冰講英文的荷李活外語導師 Andy Kreiger，與阿銀上視像英語速成班。
扭籮落中環
人靠衣裝，加上有陳慧琳御用形象指導 Ceclia協助，上週阿銀埋位正式拍廣告，穿上套裝裙，頭戴英式貴族紗帽，一身貴婦 look扭 pat踩入中環，變身後，阿銀竟然同富貴港姐莊思明餅印一樣。比起沒女極品 Meggie，執靚後被指是陳志雲加余詠珊混合體，阿銀贏晒！
拍攝八粒鐘，貴婦銀要儀態萬千行樓梯，最終 NG十幾次導演才收貨，更高難度是要滿口鄉音的阿銀對住鏡頭講英文。兩句對白，「 Ankie, So good to see you.」、「 Thank you so much.」，對阿銀而言，慘過抬布，最終要現場視像補課兩粒鐘，可惜最後「 so much」兩個字發唔到音，唯有縮短齋講「 Thank you」了事。
能夠變樣成為莊思明拍廣告，阿銀好興奮：「好似發緊夢，冇諗過可以著到貴婦咁嚟中環拍廣告，亦冇諗過要學咁多嘢，好似學行，又要扭吓隻 pat pat，行行吓鞋都飛埋出嚟，為咗呢個廣告，我之前日日行八層樓梯返屋企當練習，先發現原來個 pat pat要翹少少先行得靚！」
爆喊感恩
本週一（八月十八日），阿銀到修身堂睇廣告試片，見到「恩人」張玉珊，又忍唔住喊：「好開心張小姐俾我呢個機會，我冇諗過自己咁『烏 were』都可以拍廣告。我原本只係一個平凡深水埗師奶……原來女人係要扮靚，一星期瘦四磅，依家我有個尖下巴同高鼻。我以前好少出中環，原來深水埗同中環係咁近。」
忍唔住笑嘅張玉珊亦快速反應：「我都好少去深水埗。」醒目阿銀即刻收起淚水，打蛇隨棍上：「遲啲我第三間鋪頭開張，想邀請張小姐出席。」做老闆的阿銀，數口原來精過張玉珊。
成功將沒女鄉姑改造，張玉珊揀中阿銀，只因夠挑戰性。「第一次見佢雖然已經改造咗少少，但佢個頭都好𣲷，好好笑。而最難嘅挑戰就係要喺十日內解決佢毛孔粗大嘅問題。第二挑戰就係教佢行 catwalk，因為佢落樓梯就好似周星馳啲戲嘅女仔，行路拐下拐下。好在阿銀係好堅毅嘅女人，拍廣告幾辛苦都忍耐到。」
|
鍾意就快D Share啦！
|
|
|