好男好女
等一個家庭 陳靜
娛樂圈最忌講愛情，怕講咗被傳媒跟踪、追訪，戀情不得善終。「百果園 E神」陳靜卻主動在公開活動中開心 share，話記者知在上海有個彼此了解中、做金融業的男性朋友。不怕戀情幼苗見光死？她漫不經心說：「我個人都好老實，無需要收收埋埋，我都想大家祝福。」單身三年多的她的確想拍拖了，「我以前就唔想，想工作行先，但經理人（施念慈）好錫我，鼓勵我要有感情生活，對演感情戲可能有幫助。」
廿五歲的她，下個目標是家庭、事業兩者兼得，「我覺得我係一個遇到啱嘅，會閃婚的人，我自己希望事業和家庭可以兩全其美，我都想組織家庭，最好兩樣嘢都兼顧到，可以將時間俾多啲屋企人。」
不要富商
陳靜（ DaDa）的新發展對象是金融業打工仔，問她怎不揀個有錢的？「我自己睇緣分，無特定話擇偶條件要點。人大咗，經歷多咗，（男友）最緊要善良，錫屋企人，思想、方向一致。」她的新發展對象是在上海工作的香港人， DaDa又經常飛上海，結果被理解為她去瘟仔， DaDa笑住話：「唔係，我飛上海係探婆婆，都會同佢見面，但唔係一齊（拍拖），係了解緊。」她與外婆感情深厚，近年外婆身體愈來愈差， DaDa一有時間便去探她，「我喺香港出世，父母離咗婚，法庭判咗我俾媽咪，媽咪要搞生意開美容院，變咗我兩、三歲左右喺上海由婆婆湊，所以會特別親。」每次返上海，外婆、外公會做她喜歡的八寶飯、酒釀丸子和包餃子給她吃。
DaDa珍惜和家人相處的時光，但去年嫲嫲過身，令 DaDa不能釋懷，心內種種鬱結一次過爆發出來，令剛拿了電影金像獎最佳女配角不久的她，突然宣布退出。「因為之前嫲嫲離開，嗰段時間好內疚，因為工作關係無去陪佢，好後悔，有啲嘢錢係買唔到，唔好諗住遲啲遲啲，要做就要即刻做。」
所以，她想落實今年和家人去旅行，「早幾年事業行先，忽略咗屋企人和生活，呢一年時間分配得平衡啲，注重和家人、朋友相處，係開心咗，今年想和家人去旅行。」病情痊癒了？「無食藥了，好健康，成日做運動，比以前勤力咗。」
典型白羊座
DaDa是白羊座，有說白羊座女生性格衝動，為人率直。其實由 DaDa自爆戀情、再回看她突然宣布退出，完全體現了白羊座的特質。她笑說：「以前無遇過人生的起伏，遇到困難時，學到多面睇咗，更珍惜往後每個機會。」畢竟 DaDa十七歲便出來做模特兒，賺的是 easy money，○八年和陳柏宇拍百果園廣告打出名堂，做模特兒其實只為幫補零用，「細個屋企環境 OK，我無壓力，媽咪都錫我，佢一個女人獨力湊大我，自己覺得更加要生性，拍廣告擺吓 pose，笑吓，收入已不錯，賺幾萬蚊，又可以扮靚，覺得啲錢幾易搵所以入咗行。」
性感到極限
最激時， DaDa不介意行性感、拍寫真，但這段日子已經過去。「我影過寫真集，性感過，到而家我都覺得是我一部分，演戲角色和我現實分得好清，大家覺得我形象性感，私底下我完全唔係咁，我係勁密實，勁 casual，演出嚟嗰個係角色。」之後是否封胸？「我唔係完全唔接性感、核突戲，但我希望攞個平衡，我會先選擇其他角色，太類似之前拍過、或無乜發揮嘅角色就無必要演。」 DaDa在下齣電影《唐伯虎之衝上雲霄》（暫定），會飾演石榴姐，「以前苑瓊丹演嘅石榴印象好深刻，我第一次做古裝，演呢個角色好開心，希望俾一個新嘅石榴同大家見面。」齋賣性感的戲， DaDa說不會再接，「如果有得發揮我唔介意性感。」但 DaDa預告性感已到極限，「一定唔會有更加大的突破，因為我係重家庭觀念的人，可能媽咪婚姻唔好，我更想自己的家庭是好好，一定要有完整屋企，呢個係我由細到大的期望，人大咗，我都會為將來打算，所以每行一步要諗將來。」
|
鍾意就快D Share啦！
|
|
|