2014年8月4日星期一

吉卜力工作室解散製作部原因：宮崎駿後繼無人宮崎駿,

吉卜力工作室或解散製作部原因：宮崎駿後繼無人

2014-08-04 18:00:00

吉卜力工作室曾製作唔少經典動畫，包括《千與千尋》。

宮崎駿同鈴木敏夫等人共同創設的吉卜力工作室，曾製作《天空之城》及《龍貓》等經典動畫，最近有傳吉卜力會解散唔再製作動畫，身為宮崎駿多年戰友嘅監製鈴木敏夫，日前喺日本電視節目中，透露吉卜力或將「解體」，最大原因係受到宮崎駿引退影響，吉卜力暫時唔製作長編動畫電影，令唔少動畫迷心痛。

日前喺日本TBS電視台播出節目《情熱大陸》入面，拍低咗多年嚟同宮崎駿拍住上嘅動畫監製鈴木敏夫，出席吉卜力工作室股東會時嘅情況，佢喺會上宣佈咗令人震驚又痛心嘅消息：「雖然很難說明白，吉卜力工作室大概會解體吧，更準確一點地說，會進行一定的結構調整。」

鈴木敏夫仲話：「宮崎駿去年引退，是一個很大的契機。今後的吉卜力要怎麼走呢，說到這個話題，雖然說繼續這樣下去也不是不可能，但是不如就這樣稍微暫停一下考慮一下今後。」

看來早前已經宣佈都唔再做動畫監製嘅鈴木，已下定決心要暫停吉卜力嘅動畫製作，進行「大掃除」，迎接一個沒有了宮崎駿嘅未來。

上月有傳吉卜力唔會再製作動畫，主要係因為自宮崎駿引退之後就後繼無人，加上財政壓力都係巨大問題。

不過，外界指鈴木喺節目入面對「解體」一詞嘅解釋有啲含糊，似乎只是想暫停動畫電影製作，業務將側重於版權管理，但吉卜力工作室就唔係真係會解散，而係會喺之後重組。

其實宮崎駿舊年喺拍攝下星期香港上映嘅紀錄片《夢與瘋狂的王國》嗰時，已經透露咗吉卜力有可能解散，佢喺片入面話：「將來很明確，吉卜力會解散，我已經可以看到了，擔心又有什麼用呢?實在是無可避免。吉卜力只是我從一架飛機名字隨便取來的，它只是一個名字而已。」

85年成立的吉卜力工作室，是鈴木敏夫在《風之谷》製作完成後，為了給宮崎駿及高畑勳一個動畫製作專用地方，自《天空之城》後一直製作了20多部出色動畫電影。據悉現在作畫班都走光，將剩下一點工作人員跟宮崎駿的兒子吾朗籌備電視動畫，而上月在日本上映的動畫新片《記憶中的瑪妮》，將成為吉卜力在解體後最後一部動畫作品，似乎吉卜力隨著宮崎駿引退已成歷史。