陳樂基@KillerSoap
爆 Like王
搵《好聲音》報仇 陳樂基@KillerSoap
香港樂隊 KillerSoap主音陳樂基（ Rocky），大膽用廣東歌〈月半小夜曲〉參加《中國好聲音 3》，咬牙切齒配上激昂歌聲，一鳴驚人， 4位評判一致讚賞，成功入圍。
Rocky是首位以廣東歌參賽的歌手，片段放上 YouTube後已超過 30萬點擊，令本來冇乜人談論、出道已 11年的 KillerSoap亦人氣爆燈。但原來 Rocky上年已參加過《中國好聲音》，當時冇評判 like，甚至連片都冇得播出街，苦練一年再參賽，念念不忘，真係好大迴響！
29歲的陳樂基讀中四已贏得學校歌唱比賽冠軍，之後鑽研歌唱技巧，每日練習 6小時，跟住幾乎贏盡十八區比賽。中六時期組成 KillerSoap五人樂隊， 08年於國際大賽奪得香港區及全中國冠軍，屬勁量級人馬。
Q:點解會參加《中國好聲音》？
A:其實上年（第二輯）喺中國巡迴演出途中收到導演邀請 email，之後參加咗（以 Aerosmith的〈 I Don't Want To Miss A Thing〉參賽），但係導師一個都冇轉身，我嗰 part直情冇播出到，呢吓對我嚟講係個打擊；之後一年嚟畀心機練，錄低自己唱歌，逐樣改善。今年導演問我仲試唔試，我當然有興趣啦，呢一年嘅苦練就係為咗報仇！
Q:會繼續用廣東歌參賽？
A:可能我唱普通話，佢哋更加唔知我唱乜呢！廣東歌係高難度，但始終係我母語。我想繼續唱廣東歌，盡量係經典歌添，想人聽咗覺得係屬於我嘅歌咁樣，好似楊宗緯、蕭敬騰唱〈新不了情〉、〈背叛〉，咁我希望我都做得到。
Q:係咪要狂嗌高音至攞到高分？
A:我都做過好多歌唱比賽評判，你諗吓就知比賽係有佢嘅模式嘅，例如陳綺貞嘅歌係好好，但我唔會揀啲咁輕嘅歌嚟比賽，唔關大陸文化事，而係比賽就係需要一鳴驚人！
Q:參賽有助內地發展？
KillerSoap成立已 11年，一直在香港冇乜知名度， Rocky認為：「會有啲失望！𠵱家香港樂壇係惡性循環，收入回報少，然後投資少，變咗音樂人要做其他嘢，好多時拍緊戲、拍緊劇，冇得練歌，最後出嚟嘅作品又唔好！」
A:我哋（ KillerSoap）呢幾年都有喺內地巡迴演出，曾經喺南京有個場地係零個人，真係一個觀眾都冇，但我哋照玩晒，我嗰場內心係好激動，從此冇嘢再令我驚！
又有一個地方，開騷前有個人喺路邊刷牙洗面，我同隊友講，如果今晚多過十個觀眾，我就喺路邊刷牙洗面，卒之我係唔使洗，係咁㗎啦，邊有一步登天！
𠵱家好似好多人注意我哋，但你知𠵱家呢個社會啦，愈多人談論，萬一跌低就會跌得好慘，所以唱好啲最重要，暫時冇諗過搵唔搵到錢。
|
鍾意就快D Share啦！
|
|
|