25歲嘅姜河那，上年演《繼承者們》仍然做大配角，今年拍鬼片《怪談少女》已升呢做男一。上週專程來港宣傳，應節講鬼故嚇大家。
韓飯台
拍鬼片好邪 姜河那：想親眼見一次鬼
農曆七月十四係盂蘭節，鬼門關大開。最近每個星期六晚都見到羅蘭姐講鬼故，睇到人心都寒埋。
本地鬼故已經夠驚，韓國鬼故可能更加觸目驚心。
上週韓國新紮暖男，上年憑韓劇《繼承者們》飾演李敏鎬學長上位的姜河那，最近來港宣傳最新鬼片《怪談少女》期間接受本刊專訪，訪問中姜河那爆拍《怪》片時撞邪，甚至被鬼玩謝。自稱百無禁忌的 25歲姜河那，仲話好想親眼見一次鬼。
有怪莫怪，細路仔唔識世界呀！
Q.拍《怪談少女》期間，有冇遇上靈異怪事？
A.有呀，事實上汽車爆軚係好少發生，但拍《怪談少女》時竟爆咗 4次軚，而且唔只喺一個地方，喺唔同嘅地方都爆軚，搞到拍攝進度延遲。當時大家都心知不妙，最後全體工作人員為求安心，都走去拜神。我估計，韓國同香港一樣，電影開鏡前，除基督徒之外，其他演員同工作人員都會參加拜神儀式，希望拍攝能夠安全進行。
Q.拍戲以外，有冇試過撞鬼？
A.試過一次我同經理人一齊坐車時，突然全身郁唔到，好似被鬼壓，當時聽到後座有傾偈聲，最後我掙扎先郁得番。之後發現後座竟然冇人。呢一個可以講係惡夢，但亦係一件靈異事件。雖然我未見過鬼，但爺爺同嫲嫲自細已同我講有鬼神存在，所以我一直相信世上有鬼神，好想親眼見一次鬼。
Q.你曾自爆追女仔好主動，分享一下你表白經驗吧？
A.只要我遇到鍾意嘅女仔，我一定直接同佢講。第一次係 18歲讀高中二年級時，當時見到有個女仔好靚，就同佢講好鍾意佢。當時讀高中，認為樣靚係最重要，但𠵱家覺得靚女當然好，但最緊要係性格配合到我，大家先可以溝通到。
Q.拍戲、拍劇之外，有冇諗過進軍歌壇？
A.多謝大家欣賞。其實我完全冇想過做歌手，但有興趣唱番自己所演出電視劇嘅主題曲或插曲。其實我比較想集中做一樣我好有興趣，而且能夠做得好嘅事情。
Q.上年你憑《繼承者們》一劇上位，拍攝時有冇難忘經歷？
A.拍《繼承者們》最深印像係同各演員都好親近，所以拍攝氣氛好好，拍戲期間大家笑容從未間斷過，我仲試過喺大家面前扑低，諗起都覺得瘀。
|
鍾意就快D Share啦！
|
|
|