熱爆娛樂: [忽然1周 997] 家暴前兩月吵大鑊　阿 Yu持菜刀要脅自殺 MW,周永恒,趙頌茹

2014年9月5日星期五

[忽然1周 997] 家暴前兩月吵大鑊　阿 Yu持菜刀要脅自殺 MW,周永恒,趙頌茹

打頭陣

家暴前兩月吵大鑊　阿 Yu持菜刀要脅自殺

周永恒（阿 Roy）搞婚外情兼打老婆趙頌茹（阿 Yu），全城哄動，又有周刊爆他與小三 Ruby（劉依靜）拍淫照自娛，賤男形象深入民心。

8月 24日，阿 Yu因為小三 Ruby，與老公吵大鑊，更被老公推撞，搞到下巴縫三針兼報警。其實一年來啞忍老公婚外情的阿 Yu，情緒一直起伏甚大， 6月時曾因與老公嗌交，試過以菜刀𠝹手，以死要脅，又係報警收場。

被毆的阿 Yu匿教友家暫住，周永恒表示堅拒離婚，更聲言「在全香港人面前跪玻璃」都在所不惜。而避走新加坡散心的小三 Ruby，據知已向周永恒提出分手。風流的阿 Roy面對老婆走佬、小三離棄，付上沉重代價。

其他影片：>>家暴前兩個月警方介入　周永恒爆老婆想自殺
>>周永恒認有小三　流血趙頌茹大義滅親拉老公
>>周永恒撇唔甩第三者　阿 Yu暗示離婚
>>周永恒外婆盲撐孫仔　暗揭婆媳不和關係
>>疑似偷食淫照流出　周永恒偷嗒 Ruby一年
>>阿 Yu上公司發老脾　小三避走新加坡

8月 24日，爆出周永恒推撞老婆阿 Yu，令她受傷報警兼下巴縫三針，阿 Yu更爆家暴全因為老公有婚外情。據知事發前兩天（ 22日），阿 Yu與阿 Roy曾在公司激烈爭吵。

小三微博發聲明

被千夫所指的 Ruby，周三（ 3日）下午四時左右在微博發聲明，否認自己是慾照主角。

Ruby曾為雜誌拍內衣照。

周三（ 3日）周永恒帶埋細女接大女放學，他不欲多言，但被問到會否離婚，就堅決表示不會。

踩上公司大吵

據阿 Roy公司職員透露︰「嗰日阿 Yu上嚟老公度，冇耐就聽到掟杯聲。阿 Yu後來嬲爆爆走咗出去，阿 Roy就追出嚟。不過大家都見怪不怪，因為佢兩公婆成日嘈，估唔到兩日後就發生家暴事件。」

啞忍老公婚外情一年的阿 Yu，向傳媒爆大鑊，指控老公在 6月，已發生暴力事件，因有人手持利器，搞到警察到場攞防暴盾調停，又控訴小三 Ruby陰招搶老公。

怒掟茶杯

兩星期前，阿 Yu上周永恒公司，要老公陪食晚飯，遭周永恒拒絕，阿 Yu突然情緒激動，向他掟茶杯洩憤。

奪門而去

嬲爆的阿 Yu，奪門而去。周永恒見老婆大怒，亦只好衝出去，希望安撫老婆。

阿 Yu發聲明

「我最記掛的就是一對女兒，但基於現在狀況，實在別無選擇。因為我絕不願意令小朋友再增添任何傷害，因此我希望事件盡快畫上句號……」

阿 Yu周三（ 3日）約下午三時再發聲明，指出自己最關心女兒，希望事情盡快完結。

爆小三慫慂離婚

阿 Yu指 Ruby經常出席他們的家庭活動，與她扮好姊妹，更慫慂她向老公提出離婚。「我話同老公成日嗌交， Ruby就話你自己同佢（周永恒）講離婚，唔係會好冇面。」

小三為了留住周永恒，不惜大玩情慾誘惑，與周永恒玩 SM、制服誘惑不特止，更拍埋情慾片上網自娛。事件愈鬧愈大。

自老婆離家，周永恒被迫做帶女洪郎，日日湊女返學。 9月 3日，周永恒湊女放學，本刊向他求證淫照事件，他卻以「不回應」帶過。有指他家暴已足足一年， 6月因有人手持利器搞到報警，最後警方出動防暴盾平息事件。

記︰你係咪手持武器搞到警方出動防暴盾？

周︰其實係老婆話試吓把刀利唔利，我立即報警，佢有自殺傾向。

阿 Roy更詳細解釋當日兩人是為阿 Yu小時候性侵犯一事吵大鑊。阿 Roy與老婆當時在寓所嘉湖山莊，對於老婆小時候被性侵犯一事，他耿耿於懷，聲言要質問外父為何唔睇住個女，但阿 Yu就懇求老公多一事不如少一事。兩人大吵期間，阿 Yu情緒失控，突然衝入廚房拿着菜刀𠝹手要脅自殺，阿 Roy見老婆𠝹手，於是報警。警察上門調停，阿 Roy安撫老婆放低把刀，事件才告一段落。

記︰你成日同老婆嗌交，唔怕影響個女咩？

周︰我就係唔想個女步我後塵，其實我老竇都試過喺我細個時成日同阿媽嘈，我都好唔開心自己點解重蹈覆轍。我大女竟然同我講大人嘅事要同小朋友分開，我聽完好慚愧。

阿 Roy的大女兒真的很懂事，記者採訪期間，她突然說︰「爸爸依家曳曳，我就俾個交叉佢，佢乖番我先會俾個公主印仔獎勵佢。」

記︰ Ruby係咪慫慂阿 Yu同你離婚？

周︰冇啲咁嘅事，反而係另外一個做呢行嘅朋友勸我哋離婚。屋企係兩個人嘅事，點解要由一個外人同我哋決定，我唔會離婚㗎，我點都會溝番我老婆。

帶女洪郎

本周二（ 2日），周永恒獨自接大女放學。他特別走入商場，買了一盒糕點俾大女，慈父上身。

避走星洲

Ruby現時身在新加坡，她亦有放相上網並留言：「謠言止於智者」，想與淫照事件及小三身份劃清界線。

深知老公花弗的阿 Yu，一知老公有女埋身便打翻醋埕。早前周永恒在澳門出席活動，和𡃁模 Naomi合照，阿 Yu得悉後即在電話內大發雷霆。

認死狗箍煲

周永恒和 Ruby除了是工作拍檔，兩人私底下亦試過飛起阿 Yu，出席朋友聚會。

周永恒承認過去對老婆的種種不是，還認晒死狗話︰「我呢刻只會 foucs點樣叫番我老婆返嚟，佢想我跪玻璃都好，咁我咪喺全香港人面前跪玻璃囉。」早知今日又何必當初。據知周永恒多次致電老婆求饒，近日阿 Yu態度軟化，其實由始至終阿 Yu沒有表示堅決要離婚。

教友爆料︰「阿 Yu曾向牧師透露，還很愛老公，不過佢怨恨老公 12年來對佢欠缺關懷。其實除了 Ruby外，阿 Roy咁多年都口花花經常溝女，所以就算依家阿 Roy認錯，阿 Yu都唔敢輕信老公。咁多年阿 Yu都有睇開情緒治療師，皆因佢小時候曾被性侵犯，加上與老公婚姻出現問題，令佢情緒大起大落。」

小三劃清界線

至於小三 Ruby，據知事發後已決定與周永恒斬纜，更飛到新加坡避靜。本刊致電 Ruby，她明顯與周永恒劃清界線，更即日喺微博發聲明，澄清並非淫照主角。

對於阿 Yu指控，她一一否認。

「我係成日出席佢哋家庭活動，但唔係不請自來。至於 24號家暴嗰日我上佢屋企，係因為阿 Roy打俾我話我知佢同老婆嘈，仲話『如果頭家冇咗，寧願死』。咁我驚佢做傻事，咪上佢屋企睇吓佢，見佢冇事我唔夠半個鐘就走咗（話你挑撥阿 Yu，叫佢提出離婚。）佢哋成日打交都講我聽，近幾次係阿 Yu話想分開，我都叫佢唔好。」

小三進擊

Ruby是周永恒拍檔，亦是阿 Yu朋友， Ruby不時孖住周永恒一家人四圍去。

阿 Yu及周永恒以虔誠教友自居，兩人奉子成婚，誕女後一家一齊受洗，之後曾多次做見證。

聲明顯示有彎轉

阿 Yu曾做記者，又做過時裝店 sales，不過近年全職湊仔，經濟上完全靠老公，難怪她要啞忍花心老公。

至於拍淫照勾人老公，她說︰「我覺得好好笑，如果我有相中人咁好身材，對腳咁長，我可以去行 catwalk啦。不過講到底，如果佢（阿 Yu）要證實我係衰，我講咩都係錯。佢哋夫妻嗌交好正常，牀頭打交牀尾和。」說罷便匆匆收線。

記者致電阿 Yu，但她手提電話長期接駁到留言信箱。 9月 3日，阿 Yu發聲明，表示想「安靜療傷」，但絕口不提離婚，可見這段婚姻尚有彎轉。正如阿 Yu的情緒治療師 Susana所言，「有危即有機」，經歷家暴風波，兩夫妻若能重新面對，可以破鏡重圓，對兩個女兒未嘗不是好的結局。