探熱針
告別大台 凍薪五年頂唔順 高鈞賢轉行整車
近年無綫人才流失，花旦小生約滿即逃亡，大台數口太精！減騷凍薪，藝人冇啖好食，雞飛狗走。在大台出身的首屆香港先生冠軍高鈞賢，已連續被凍薪五年，人工唔夠生活；加上之前腳傷仍被迫拍跑戲，對大台心死的他，寧願轉行，整車。
得三千蚊生活
今年九月，高鈞賢約滿無綫，決定離巢外闖，正式告別大台。
「 Matthew（高鈞賢）今年傾續約時，有個高層叫佢慢慢諗，仲話公司會撐佢，但另一個高層就逼佢要喺一、兩日內回覆，否則就唔同佢續約。其實佢當選港男之後，簽俾無綫，人工得一萬五千蚊，但第三年就加到二萬五，當時佢好開心，不過之後公司要佢加監， Matthew唔肯，跟住嗰五年一直俾人凍薪。」知情者說。
二萬五一個月，未至於不夠生活，但弊在高鈞賢由萬五跳去二萬五一個月後，買車又買樓。「後生仔有人工加特別心雄，屋企人又想支持佢，所以夾錢買樓買車，俾佢當投資。 Matthew估唔到之後竟然冇人工加，以為條數計得掂，點知俾公司凍薪五年，結果每個月扣起供樓供車錢，佢得番三千蚊用。」
經濟壓力已經大，高鈞賢之後更患上情緒病，雪上加霜。
「 Matthew做唔夠騷，公司要佢還騷，明知佢隻腳傷咗要打石膏，都要佢接《再戰明天》做個閒角，仲要帶傷拍跑戲，後來 Matthew屋企人發覺佢有啲唔妥，要佢睇醫生，先至知佢有抑鬱症。睇呢啲專科每次過千蚊， Matthew嫌貴，睇咗一次就唔肯再睇，好在屋企人夠細心同耐性，陪佢捱過情緒受困擾嗰段日子，而家佢都好番。」
借錢入股
凍薪入不敷支，高鈞賢最絕望時，得朋友帶挈，讓他入股車房生意。
「 Matthew問屋企人借咗五萬入股車房，好在生意好有錢賺，可以幫補生活開銷，而家佢諗住暫時做車房，慢慢再探吓路，睇吓有機會就返內地發展。」知情者說。
上週三（九月三日），本刊記者到高鈞賢有份的車房了解，只見他落手落腳，招呼客人、整車乜都做；午飯時間，他更親自去買飯盒給其他師傅醫肚，好落力。
對於告別大台，高鈞賢毫不隱瞞。「係呀，已經考慮咗好耐，想有其他嘗試。」至於被舊主凍薪五年，他直認有其事。
「我唔肯定係咪 exactly五年，但之前凍薪又要加長份約，我唔想無止境咁加監，先搵其他出路。」高鈞賢說。
一走了之
大台人事複雜，易主後，高層大鬥法，殼王陳國強得力余詠珊力捧自己友，高層各擁山頭，無黨派藝人變孤兒仔，不少人寧願一走了之，出去搏。
袁嘉敏
已轉投太陽娛樂進軍影圈的 09年最上鏡小姐袁嘉敏，憑《潛行狙擊》阿嫂角色突圍，本來一致被睇好，不過一劇之後被投閒置散，傾續約時更被高層提議轉做保險，並送上《聖經》以示祝福，非常不近人情。
石天欣
參演《仁心解碼 2》及《巨輪》都要被強姦的石天欣，雖然人氣升，更一度升呢做女二，但之後又被打回原形，人工奀冇前景，唯有解約走人。
|
鍾意就快D Share啦！
|
|
|
