探熱針
全城缺飛 鄭裕玲獨霸 1,000張 黃子華： DoDo開聲就點都要做到！
下個月第三度在紅館舉行「棟篤笑」的黃子華，十一場門券在零宣傳情況下被秒殺，唔少人想盡辦法亦撲唔到飛。不過，當中亦有人例外。
2000年與黃子華傳過緋聞的 Do姐鄭裕玲，冇米粥煲唔起，但二人卻十分老友， Do姐更得子華厚待，要幾多張飛有幾多，源源供應，結果，全城缺飛，但 Do姐就獨霸千張。 Do姐掃飛支持，子華得戚說： DoDo開聲，我就點都要做到！
私下約食飯
黃子華事隔兩年再開「棟篤笑」，十一場《唔黐線唔正常》一日售清，甚至出現八倍價錢炒飛熱。一票難求，偏偏與子華傳過緋聞的 Do姐鄭裕玲得到厚待，要幾多有幾多。
「內部認購啲飛好快就爆咗，仲講到明有機會俾人 cut飛，但 Do姐就例外，冇 quota，佢落幾多都有！好多無綫友都係搵 Do姐先訂到。」知情者說。
二○○○年合作《男親女愛》， Do姐與黃子華一度傳過緋聞。
「外面啲人覺得係 Do姐暗戀子華，其實佢哋真係 friend，久不久就會約出嚟食飯！」
所以只要 Do姐開聲，子華亦無托手踭，十一場《唔黐線唔正常》， Do姐要一千張飛，照有！
「基本上每次子華開騷， Do姐一定捧場，佢今次攞咁多飛，有幫人訂嘅，亦有啲係請朋友睇嘅！子華亦一定留靚位俾佢！」
合作睇劇本
去年台慶頒獎禮，黃子華獲封視帝，也是由 Do姐現場打電話向身在外地的黃子華報喜。
「 Do姐一早同子華溝通好，如果有獎會打電話俾佢，叫子華一定要接電話，因為現場直播，佢哋一向都有私下聯絡，大家只係唔知兩個原來咁好交情。」
已回巢無綫的監製徐正康，也一直想撮合 Do姐和子華再合作，開拍《男親女愛》續集。
「套劇口碑咁好，收視又破晒紀錄， Do姐同子華都覺得如果無好劇本，就唔應該再拍，所以無應承徐正康！」 Do姐友人說。
三千萬落袋
棟篤笑長做長有，今次開騷，有指黃子華淨袋三千萬。今年初，他一擲二千多萬購入北角雲峰大廈，連同○九年買入的何文田恒信園，個人名義持有四千萬物業。
「子華住咗何文田好多年，但因為女朋友住慣港島區，佢先搬過海。」
週日（九月二十一日）傍晚七時，黃子華獨自駕車外出，發現記者原本黑晒面的他，一聽到 Do姐大手掃飛，即刻笑番晒。「 DoDo開聲，我就點都要做到！」之後上車踩行油走人！
冇米粥
00年，鄭裕玲與黃子華拍劇集《男親女愛》傳出緋聞，男方更當眾說：「 I love DoDo！」擺明煲水，但呂方依然高調維護女友，否認情變。至 08年，鄭裕玲突然宣布與呂方 16年情玩完；而 02年與化妝師溫安妮（ Annie）撻着的子華，拍拖九年，最終亦分手收場。去年，他被發現與貌似范曉萱的新歡齊齊睇樓睇鋪，女友更自出自入子華寓所。
|
鍾意就快D Share啦！
|
|
|
