探熱針
Kabby坐正 松岡行得走得 星爺內定美人魚
對向太插爆一事保持沉默的周星馳，日前閃縮現身深圳，為其新作《美人魚》公開招募進入最後六個階段做評判。其實當晚的真人騷只是一場大龍鳳，據了解，大熱香港代表 Kabby許雅婷早已內定做女一，至於由星爺親自夜釣進入比賽的松岡李那亦已獲分派角色，被呵住的她毋需浸水扮美人魚，有腳做正常人。
整色整水搞招募
月初開始，周星馳為新戲女主角在中、港、台進行網上招募，有超過六萬人報名，萬計參賽者晒胸唱 rap，在鏡頭前卸妝露真樣奇招盡出爭入圍，經過為期一星期才藝訓練，上週二（九月十六日）已揀出最後六強，進入決賽。
據了解，鬥餐死也不過是陪人做騷，其實星爺早已心中有數，內定女主角人選。
「比賽開始無耐已經收到風 Kabby係做女一，佢間經理人公司有份投資套戲，所以坐定粒六，連本來應承同惠英紅合作套鬼片都推埋，比較起其他女仔， Kabby比賽時都真係特別鎮定。」知情者說。
做硬女一， Kabby經理人 Roy答得技巧。「我哋仲未收到劇組通知，不過就知最後有份入圍嗰六個女仔，全部有份參與呢部戲。」
戲份愈加愈多
至於早已得到星爺關注的松岡李那雖然冇得坐正，但戲份亦不少。「松岡嘅角色好搶，佢唔使做嗰啲唔係抽筋就黐咗筋有缺陷嘅美人魚，可以做番一個正常靚女，又唔使浸住水開工咁辛苦。」
難得有機會埋周星馳堆，熱情的松岡不敢怠慢，近期頻頻以問劇情講角色做藉口，跟星爺短訊交流，愈主動，松岡戲份亦愈加愈多。
此外，戲中男主角亦落實是跟星爺合作過的小豬羅志祥。「其實星爺想用徐崢多啲，因為佢有內地票房，不過佢嚟緊要開自己部《港冏》，年底先有期，但深圳啲景已經搭好，星爺唔想拖，所以都係用俾到期嘅小豬。」知情者說。
|
鍾意就快D Share啦！
|
|
|
