陳嘉寶「嗒糖」60萬名車賣萌抓折
o靚模變吸金女神，吼實半百萬名車！陳嘉寶（Anjaylia）多得劇集《女人俱樂部》帶摰，半年間招財進「寶」勁賺300萬，加上有富貴初戀男友這條大水喉射住，令她由屋邨妹榮升「90後」小富婆，Anjay日前大晒索腿出巡，到車行揀中60萬名車，更以「港女賣萌三式」電暈男經紀，隨時有意外折頭！
現年24歲的陳嘉寶（Anjaylia）在18歲殺入o靚模界，當年憑住齊陰可愛look拍廣告爆紅，獲封宅男女神，不過星途未見標青。直至今年初憑無綫劇《女人俱樂部》的四眼清純形象再次喚起宅男心，人氣升到嘭嘭聲。
據悉，劇集播出至今半年間，Anjay已接拍了七個代言廣告，包括瘦身產品、服裝等品牌，另加近30個商演活動，估計吸金高達300萬！事業得意，愛情同樣順風順水，身為戀愛初哥的她成功釣得金龜，搭上有米男友Epaphras，有傳對方家族擁有至少7個物業。
穿背心晒腿出巡
泊得好碼頭後，Anjay開始鋪定後路，將軍澳屋邨出身的她早就希望盡快上車做業主，又想買車代步，以免同人逼地鐵。儲足彈藥後，這位「90後」小富婆終於出手，日前被本報記者發現與經理人，在尖沙咀「Audi」車行睇車，她當日身穿背心晒腿出巡，在車行內她對車價60萬的五人吉普車似乎相當有興趣，不斷向男經紀問個究竟。
齋聽一輪後，她索性親自登上司機位試手感，又打開車尾箱研究一番。期間，睇車睇到入神的Anjay不忘發揮女神功力，使出「港女賣萌三式」冧掂車行男經紀，包括咬手指、嘟嘴仔及發電眼，隨時成功爭到折頭！睇足半小時，她發現被拍，於是即到櫃枱索取汽車資料離開。
否認獲男友資助
步出車行後，Anjay直認因近排工作太多，有意做車主方便出入：「的確係嚟揀車，不過睇吓先，未決定。心水嗰架60幾萬，但經理人話我駕駛經驗唔多，叫我平啲，可能揀40萬左右。」她又表示會暫時擱置買樓計劃，反而想先買車代步：「呢排好多劇、電影，個期好密，買車需求迫切啲。（《女》後收入大增？）真係多咗工作同收入。」問到男友可會揼水資助？她說：「唔會啦，我又唔係賺唔到，不過會搵佢幫我試車同埋幫手睇路。」
文：音樂組
|
鍾意就快D Share啦！
|
|
|
