19/9
劇中蔡思貝同羅仲謙係一對，所以有唔少親熱場面。上週五（ 19日）二人喺十份吊橋拍攝接吻戲，性格爽朗嘅蔡思貝拍吻戲絕不扭擰， 2個 take就搞掂！
真面目
男士恩物 明錫羅仲謙 姣精蔡思貝暗拖奀星
上年港姐亞軍蔡思貝，當選後即被大台力捧，出道未夠一年，已經喺重頭劇《衝線》孭飛做女一。事業上位，鬼妹仔性格除咗冧掂高層，亦令佢成為電視城新姣精，合作過的小生都幾乎被佢電暈。上周《衝線》到台灣取景，已同大隻舞男麥秋成拍緊拖的蔡思貝，除咗同劇中男主角羅仲謙拍咀戲，鏡頭後竟然同有模女友嘅《巨聲》「大孖」周志文玩摸手仔，又向對方撒嬌。上周風大雨大的台灣好彩仲有蔡思貝發熱啫。
大台花旦走剩冇幾，造就上屆港姐亞軍蔡思貝同冠軍陳凱琳極速擔大旗。 23歲蔡思貝出道未夠一年已經在新劇《衝線》做女一。除咗樣靚有身材，曾經在新西蘭及德國讀書的蔡思貝亦有鬼妹仔性格，台前幕後統統被佢冧掂。上年拍《八卦神探》就傳他同劇中拍檔鄭俊弘有曖昧。
連啜兩次
經過電視台一年操練，蔡思貝電力有增無減。早前就被本刊拍得同大隻舞男麥秋成拍拖同居，男方更接載送女方去電視城開工。點知上星期《衝》劇到台北取景，冇男友睇實，蔡思貝即刻放電，就算對方有女友都一樣唔放過。
上週五（ 19日）劇組到十分取景，其中更有咀羅仲謙戲分，雖然蔡思貝拍劇經驗少，但拍接吻戲一啲唔怕醜。未 roll機蔡已經捉實羅仲謙，難得新人都咁「入戲」，導演拍咗兩個 take，每次鍚足 3秒就收貨。
大孖摸姣港姐手仔
充滿電力嘅蔡思貝，幾乎電暈劇中所有男演員。其中本身已有模女友袁聖殷的大孖周志文，簡直最「食電」，唔只埋位前同蔡思貝拖手仔，兩個仲要超埋身傾偈。
「我哋好開心！」
冧掂對手羅仲謙唔難。二人對手戲多，冧得掂當然是常識，估唔到蔡思貝連三線、《巨聲》出身的「大孖」周志文都唔放過。由於二人同場戲份多，所以火速熟絡。二人除咗 ig互相關注外，當日與羅仲謙拍咀戲前，蔡思貝亦忽然向周志文撒嬌；而周志文亦相當受落，拉對方埋身，更幾乎面貼面傾偈。
週一（ 22日)劇組休息。蔡思貝同一眾演員到附近食日本菜，期間即使有吳若希同場，蔡思貝都寧願坐周志文及羅仲謙隔籬。飯後本刊記者上前問蔡思貝怕唔怕傳出緋聞，蔡風騷回應：「 OK嘅！我哋一家大細都好開心嘅！」
大台跟得快
大台出名「反應」快，見鄭中基拍《神秘寶藏》講張保仔，佢哋即刻整套《張保仔》；見金像導演林超賢拍緊講述單車選手嘅《破風》，佢哋又即刻趕製呢套《衝線》，真係追得好貼喎！
|
鍾意就快D Share啦！
|
|
|
