心穎BB甜笑相睇 電暈Banker
港姐出身的黃心穎，近年升級為新一代宅男至愛，獲封「心穎BB」的她一直表示恨拍拖，dry足多年，早前還自薦上相睇節目望搵個好男友，前日心穎再度出擊，扮得靚靚現身speed dating，席上還與坐在對面的一名黑衫斯文男表現投契，期間心穎多次冧爆甜笑又與對方交換電話，看來她「破dry」有望！
今年25歲的2012年港姐亞軍黃心穎，自入行以來緋聞不多，一直單身的「心穎BB」不時表示想找另一半，恨拍拖恨到出口！她早前還自薦上男女配對真人騷節目《搵個好男人》寄望「破dry」，不過心穎BB於節目上最終未能覓得「心上人」。
傾三粒鐘交換號碼
心穎BB未有灰心，前日她出席新劇《再戰明天》的活動後，見她一臉心急前往取車，直駛油塘寓所，及至下午約6時，明顯換衫後扮得靚靚的心穎，又再驅車前往銅鑼灣，泊好車後她見時間尚早，於附近商場閒逛一會，心情大好的她不時講電話，之後又往揀選太陽眼鏡，試完一輪便扑錘買下心頭好。之後，心穎選擇逼港鐵往灣仔出席Speed Dating，看來是因為怕佔中事件影響交通而遲到，果然對此次約會極為重視！心穎到達灣仔後即與數名男女會合，一行人再步入一間西班牙餐廳，心穎與數名女友人被安排與數名男士面對面排排坐，只見心穎與對面的斯文黑衫男甚為投契，兩人傾個不停，心穎不時冧爆甜笑，及後還與男方交換電話，明顯極有好感！一行人最終吃了近3小時才離開，心花怒放的心穎與黑衫男步出門口時依然雞啄唔斷，及至發現記者拍照，心穎才尷尬向鏡頭揮手，之後匆匆乘港鐵返回銅鑼灣取車後回家。
出席男士非富則貴
心穎昨日接受本報訪問時，被問到出席Speed Dating一事，她尷尬笑說：「哈哈，都唔算，因為有個朋友生日，佢知我單身冇男友，所以特登介紹男仔我識。當日另外幾枱都係新相識嘅男女，氣氛好好。」問到聚會上的男士可合她心意？她頻頻甜笑說：「都OK嘅，全部都喺溫哥華畢業後返香港做嘢，有啲做家族生意，有啲係Banker（銀行家），（有冇發展機會？）大家第一次見，識咗一日咋，會私底下再聯絡，我25歲喇，唔可以隨便開始一段感情，要識耐啲了解下先。」問她是否抗拒Speed Dating？她說：「少少啦，但我呢行好難識人，識多啲朋友都好嘅。」
文：追蹤組
|
鍾意就快D Share啦！
|
|
|