黃子華澳門棟篤笑刪走佔中
【雨傘革命】
【澳門直擊】雨傘革命邁入第30日，敢言藝人不斷遭受打壓、滅聲、封殺的威脅，現年54歲的棟篤男神黃子華，於佔領行動遭催淚彈鎮壓的水深火熱時刻，他連日在紅館台上力撐雞蛋對抗高牆。然而，前晚子華轉到澳門站開騷，竟封口不提佔中的敏感話題，子華將於年尾返內地多個省分舉行巡迴演出，之前已傳廣州站被取消的他，疑受壓下惟有推出原稿登場！
黃子華於本月初在紅館舉行11場《唔黐線唔正常》棟篤騷，由於適逢雨傘革命被暴力鎮壓，子華每晚在台上都講佔中為民發聲。曾在紅館台上形容目前香港像中了毒，以雞蛋與高牆比喻的子華說：「我一定係企喺雞蛋一方」、「香港人終於可以光明磊落一次」、「香港嘅問題好似婆媳糾紛，係必然瀨嘢關係」……這些精警說話，前晚在澳門站威尼斯人金光綜藝館頭場棟篤騷竟全部消失！
■子華前晚於澳門威尼斯人舉行棟篤笑，全程對佔中隻字不提，似自我河蟹。
內地騷鐵定舉行
子華突然封嘴不提佔中，有估計是因他將於年尾到廣州、深圳、中山等站展開內地巡迴棟篤騷有關，疑內地主辦商向子華施壓，他無奈作出自我審查鏟走佔中。其實，早前網上已傳子華棟篤騷因題材敏感，未能取得內地批文，廣州站被取消，雖然其後子華經理人否認，但澳門騷刪佔中內容事不尋常，加上同樣撐學生的林夕，日前原訂在北京站舉行的座談會被取消，難免懷疑子華受壓。澳門站的觀眾又以澳門和內地客為主，子華可能因應觀眾層面而改動內容。
問到子華是否受壓避談佔中？他的經理人May昨日回覆：「唔係，佢兩年前籌備緊，有本身原稿，去到唔同地方，希望畀大家睇到原稿。」問子華是否因封殺傳聞自我審查？她否認：「封殺係傳聞，都冇呢個問題，點會諗驚唔驚。」至於內地巡迴是否不提佔中？她說：「相信都係原稿，可以話畀大家知如常舉行。」
■整晚棟篤笑子華都有擦澳門鞋，更獲粉絲送花。
「我要搬嚟澳門」
刪走佔中話題後的子華騷，改以狂讚澳門是天堂以及揶揄內地人外遊的笑位作話題。其中談到人只着重生產力，子華謂：「香港生仔就前四後六（產假），澳門呢？」台下即高呼：「52日！」子華再問：「咁死老竇呢？」台下又高呼：「3日！」有點意想不到的子華說：「3日？死老竇都放3日？澳門真係天堂呀！香港1日都冇，同老闆講『我死咗老竇呀！』『咁你食多半個鐘頭晏啦。』」得悉澳門連耶穌死都有假放，子華即作狀扮暈：「我要搬嚟澳門，澳門破晒我所有concept。」
【澳門人】
■觀眾鄭小姐（左）與李小姐直言不想子華講佔中。
【香港人】
■林先生對子華避談佔中感失望。
子華又爆出金句大談中國人飲酒文化，他說：「中國人叫人飲酒有四大步，最後一步係『respect don't drink drink punish』，即係敬酒唔飲飲罰酒呀。點解要罰？因為你唔畀面，我唔係要你打從心底尊敬我，你求其飲咗咪算囉，正所謂『under the sky no dinner no finish』天下無不散之筵席。」
本身是澳門人的現場觀眾鄭小姐及李小姐，直言不想子華講佔中，鄭小姐說：「我有留意但係唔想佢講，因為我想知道佢原本想同我哋講乜嘢。」而專程由香港到澳門睇騷的林先生及林小姐，則坦言對子華未有再提及佔中感失望。
採訪：盧妹
攝影：陳慧安
潘紹聰X柳俊江
星期一至五 晚晚「搵鬼睇」
http://hk.apple.nextmedia.com/horror
【三個粉絲去首爾】
追星實錄，即上韓劇讀: http://hk.apple.appledaily.com/kstar
|
鍾意就快D Share啦！
|
|
|