【選擇性unfriend？】王晶指發哥冇撐佔中：佢冇政治立場
2014-10-27 16:21:00
因為「佔領運動」而出現嘅unfriend潮，演藝界都不能倖免，王晶就高調喺微博宣布要刪走杜汶澤﹑何韻詩同黃秋生三人嘅聯絡電話，最奇係後面兩位都話自己冇王晶電話，而何韻詩就更加冇同王晶合作過嘅。而同王晶都間中合作嘅周潤發，就唔喺王晶嘅unfriend list入面。
其實喺警方丟出87枚催淚彈第3日，發哥已經開聲，清楚成件事係點形成，而唔係一味責難一邊，點樣去解決，「政治問題，政治解決」清楚易明，不過王晶似係偏向「政治問題，法律解決」，所以佢冇unfriend周潤發，因為內地傳媒指周潤發只係發表同情學生嘅言論，並非支持「佔中」，王晶就喺微博引述話：「就是某些不良傳媒故意放大，硬想拖他下水，居心險惡」
之前再話：「發哥人好，全港皆知，有的傳媒硬要拉他和劉德華梁朝偉下水，暗示他們支持佔中，真是卑鄙之極。其實三位只是認同學生追求理想，珍惜香港未來的接班人，不希望他們受傷，並無政治立場。上述三點我也一樣贊同，只是不認同佔中堵路這種手段而已，試問誰不想香港平平安安？」其實「堵路」只係佔領者的手段而非目的，人人皆知，未知是王晶是否故意視而不見，再看看10月1日發哥當日受訪的原文:
「市民學生爭取訴求好勇敢，令人感動，警方第一日已經係錯咗，使唔使用到掟催淚彈呀？學生全部都好理智，如果政府唔係有一個新方案，令到香港市民學生滿意，呢個抗爭我諗唔會停。學生叫梁振英落台，其實你叫邊個落台都無補於事，o依家最主要係解決咗個方案先。」
「如果政府再用暴力對付學生，你令香港市民好反感。佢哋個訴求好清楚，點解你成日叫人袋住先，你唔可以接納一個方案，係政府你袋住先？咁有錢，你後面有中國backup你，我都唔知你怕乜？學生或市民如果達唔到要求，大家只會繼續拉布，應該討論一個方案，係雙方可以接受，咁先係解決方法。我唔想見到有邊方面受傷，學生係好理智好聰明和平抗爭，你毋須用咁暴力嘅催淚彈，你一定要解決咗佢先，你唔可以避，梁振英唔可以避。」
發哥表示「學生係好理智好聰明和平抗爭」，亦知道政府拋咗乜嘢「袋住先」方案出嚟，仲反問返政府又可唔可以袋住先，發哥是清楚知道「政治問題，政治解決」，政府要「解決咗個方案先」，市民先會走，而唔係警方一味清場，思路如此清晰，不過王晶唔係發哥肚裡面條蟲，可能真係唔知佢諗乜嘅。
而日前被雜誌訪問到正開工的發哥，問到佢可能被內地封殺，佢亦只係淡然回應：「咪搵少啲囉。」而唔係好似Kenny G咁急轉彎，寫「鴻文」同「佔中」割蓆。
王晶微博
|
鍾意就快D Share啦！
|
|
|